Կրակոցներ Սպիտակ տան մոտ․ Թրամփը միջադեպն ահաբեկչություն է անվանել

Վաշինգտոնում Սպիտակ տան մոտ կրակոցներ են հնչել։ ԱՄՆ նախագահ Դոնալդ Թրամփը հայտարարել է, որ Ազգային գվարդիայի երկու զինվորների վրա կրակելու մեջ կասկածվում է թալիբներից փախած աֆղան տղամարդ։ Նա միջադեպն «ահաբեկչական ակտ» է անվանել, գրում է France 24-ը։

Միջադեպի հետևանքով Ազգային գվարդիայի երկու ծառայողները ծանր վիրավորվել են։

«Դա հանցագործություն էր մեր ամբողջ ազգի դեմ»,- հայտարարել է Թրամփը՝ հաստատելով, որ ձերբակալված տղամարդն «օտարերկրացի է, որն ԱՄՆ է եկել Աֆղանստանից»։

Թրամփի կարգադրությամբ զորքեր են տեղակայվել երկրի մի քանի քաղաքներում, այդ թվում՝ Վաշինգտոնում, Լոս Անջելեսում և Մեմֆիսում։ Այս տեղակայումները բազմաթիվ դատական ​​​​հայցերի և բողոքի ակցիաների պատճառ են դարձել տեղական պաշտոնյաների կողմից, որոնք հանրապետական գործչին մեղադրում են ավտորիտար իշխանության ձգտման համար։

Ըստ հրապարակման՝ Թրամփի հայտարարությունը նաև ենթադրում է, որ երկրից անօրինական ներգաղթյալներին դուրս բերելու նրա վիճահարույց ջանքերը նոր թափ կստանան։

«Մենք պետք է վերաքննենք յուրաքանչյուր օտարերկրացու, որը մեր երկիր է մտել Աֆղանստանից նախկին նախագահ Ջո Բայդենի օրոք։ Մենք պետք է ձեռնարկենք բոլոր անհրաժեշտ միջոցները՝ ցանկացած երկրից այստեղ արտաքսումը չհանդուրժելու համար, եթե նրանք չեն կարողանում սիրել մեր երկիրը, մենք նրանց չենք ուզում»,- հայտարարել է ԱՄՆ նախագահը։

ՀԴԲ տնօրեն Քեշ Պատելը նշել է, որ Ազգային գվարդիայի երկու անդամները «ծանր վիճակում» են։

Թրամփը ավելի վաղ սոցիալական ցանցերում հայտարարել էր, որ կասկածյալը «նույնպես ծանր վիրավոր է, բայց անկախ դրանից՝ շատ բարձր գին կվճարի»։

Կրակոցներից հետո պաշտպանության նախարար Փիթ Հեգսեթը հայտարարել է, որ Վաշինգտոնում կտեղակայվի ևս 500 զինվորական, ընդհանուր առմամբ՝ մինչև 2500։

Անցյալ հինգշաբթի դաշնային դատավորը որոշել էր, որ Թրամփի կողմից ԱՄՆ մայրաքաղաքում Ազգային գվարդիայի  զինվորների տեղակայումն անօրինական է։

Թարգմանությունը՝ Էմմա Չոբանյանի