03.08.2026 | 16:15
Կառավարությունից ու համայնքապետարաններից՝ խորհրդարան․ ովքեր են ՔՊ-ի նոր պատգամավորները
Պուտինի «մտերիմ դաշնակից» Ալիևը վրեժ է լուծում Ռուսաստանից՝ կործանիչներ վաճառելով Ուկրաինային․ Express
Քաղաքականություն
24.11.2025 | 21:12
Ռուսաստանի նախկին մտերիմ դաշնակիցը գաղտնի կերպով կործանիչներ է վաճառում Ուկրաինային, ինչպես նաև գազի մատակարարումներ իրականացնում։ Ռուսաստանն ու Ադրբեջանը տարիներ շարունակ դաշնակիցներ են եղել՝ ընդհանուր պատմությամբ և Խորհրդային Միության կազմում նրանց համատեղ անդամակցությամբ, գրում է բրիտանական Express-ը։
Ըստ հրապարակման՝ վերջին տարիներին երկրները հեռացել են միմյանցից, իսկ Բաքուն ձգտում է իր վերահսկողությունը տարածել Հարավային Կովկասի վրա և նվազեցնել Ռուսաստանի ազդեցությունը տարածաշրջանում: Այս գործընթացում Ադրբեջանն ամուր կապեր է հաստատել Թուրքիայի հետ, որի հետ ունի ընդհանուր մշակութային և լեզվական ընդհանրություններ: Բաքվի և Մոսկվայի հարաբերությունները կտրուկ վատթարացել են անցյալ տարի, երբ ռուսական ուժերը պատահաբար խոցել են ադրբեջանական ուղևորատար ինքնաթիռը, երբ այն թռչում էր Չեչնիայի վրայով: Ադրբեջանի նախագահ Իլհամ Ալիևը սպառնացել էր Ռուսաստանին տանել «միջազգային դատարան»՝ այն բանից հետո, երբ Վլադիմիր Պուտինը փորձել է հերքել ողբերգական միջադեպի համար պատասխանատվությունը։
Լրատվամիջոցը գրում է, որ չնայած երկու ավտոկրատ ղեկավարները հոկտեմբերի սկզբին հանդիպել էին Տաջիկստանում՝ իրենց տարաձայնությունները լուծելու փորձ կատարելու համար, հարաբերությունները շարունակում են լարված մնալ։ Ալիևը, կարծես, որևէ փորձ չի անում Պուտինի հետ հարաբերությունները կարգավորելու ուղղությամբ, բայց անում է ամեն ինչ՝ իր ռուս գործընկերոջը թշնամացնելու համար։
Հաղորդվում է, որ Բաքուն Ուկրաինային Սու-22 կործանիչներ է ուղարկում Թուրքիայի, Սուդանի և Գերմանիայի միջով անցնող գաղտնի լոգիստիկ շղթայի միջոցով։ Կործանիչներն անվանել են որպես մարդասիրական օգնություն և ուղարկվել այն երթուղիներով, որոնք մի ժամանակ տեղափոխում էին Ռուսաստանի հետ կապված զենք։
Ադրբեջանը նաև գազ է մատակարարում Ուկրաինային Տրանսբալկանյան խողովակաշարով, որը մի ժամանակ Ռուսաստանի գերիշխող երթուղին էր։ Ծավալները փոքր են, բայց գործարքը Կիևի առաջին այլընտրանքային աղբյուրն է ռուսական բոլոր ներմուծումները կրճատելուց հետո։
Ադրբեջանն ունի խորհրդային և ռուսական արտադրության զենքի մեծ պաշարներ, որոնք կարող է վաճառել Ուկրաինային։ Զինանոցը ներառում է հրետանային համակարգեր, համազարկային կրակի ռեակտիվ համակարգեր (MLRS), զրահատեխնիկա և տանկեր։
Նշվում է, որ Բաքուն նաև ունի մի քանի «Տոչկա-Ու» կարճ հեռահարության բալիստիկ հրթիռային համակարգեր, որոնք այժմ լրացվում են ավելի առաջադեմ իսրայելական հարթակներով։
Թարգմանությունը՝ Էմմա Չոբանյանի
