Հայաստանը մաքսային ծառայության ոլորտում խորացնում է հարաբերություններն Իրանի հետ

Հայաստանի ու Իրանի մաքսային ծառայությունների ղեկավարները ստորագրել են «Հայաստանի Հանրապետության կառավարությանն առընթեր պետական եկամուտների կոմիտեի և Իրանի Իսլամական Հանրապետության մաքսային ծառայության միջև մաքսային վիճակագրական տեղեկատվության փոխանակման մասին» արձանագրությունը: Բացի այդ, ապրիլի 27-29-ին Հայաստանի ՊԵԿ նախագահ Վարդան Հարությունյանի գլխավորած պատվիրակությունը Թեհրանում էր, որի ընթացքում ՀՀ ՊԵԿ նախագահը Իրանի ֆինանսների և էկոնոմիկայի նախարարի տեղակալ, մաքսային ծառայության նախագահ Մասուդ Քարբասիանիի հետ հանդիպման ժամանակ քննարկել են նաև երկու երկրների համապատասխան մարմինների միջև համագործակցությունը նոր մակարդակի բարձրացնելու հետ կապված հարցեր: 
Զրուցակիցներն ընդգծել են, որ այն կնպաստի երկկողմ առևտրաշրջանառության աճին, տարանցիկ բեռնափոխադրումների ծավալների մեծացմանը, ինչպես նաև զբոսաշրջության զարգացմանը: Վարդան Հարությունյանը գոհունակություն է հայտնել, որ իրանական կողմը ձեռնամուխ է եղել հայկական համարանիշներով ավտոմեքենաների Իրան մուտքի համար վճարների հետ կապված խնդիրների լուծմանը և հույս հայտնել, որ շուտով խնդիրը կկարգավորվի: Թեհրան կատարած այցի ընթացքում ՀՀ ՊԵԿ նախագահի գլխավորած պատվիրակությունը հանդիպում է ունեցել նաև Իրանի գործարար շրջանակների հետ:

Թե՛ իրանական, թե՛ հայկական կողմերը բազմիցս են երկկողմ առևտրատնտեսական հարաբերությունները խորացնելու ցանկություն ու պատրաստակամություն հայտնել՝ հատկապես Իրանն, ու հատկապես՝ ԵՏՄ շուկային Հայաստանի միջոցով կապվելու նկատառմամբ։ Առհասարակ՝ ԵՏՄ-ին անդամակցելուց հետո Հայաստանի ղեկավարությունը աշխարհի տարբեր երկրների ու ընկերությունների հրավիրում է Հայաստան՝ հայտարարելով, թե մեր երկրը, լինելով ԵՏՄ անդամ, ինչպես նաև ԱՄՆ-ի ու ԵՄ-ի հետ ունենալով արտոնյալ առևտրի GSP և GSP+ համակարգեր, կարող է կամուրջ հանդիսանալ ԵՏՄ-ի ու Արևմուտքի միջև:

Նույն ոճով աշխատում է նաև ԵՏՄ-ում Հայաստանի գործընկեր Բելառուսի նախագահ Ալեքսանդր Լուկաշենկոն․ ինչպես տեղեկացնում է ՏԱՍՍ-ը, մի շարք պետությունների դեսպաններից հավատարմագրեր ընդունելու ժամանակ Բելառուսի նախագահը հայտարարել է, թե արտասահմանյան երկրները կարող են օգտվել Մինսկի հետ համագործակցությունից՝ Եվրասիական տնտեսական միության շուկա դուրս գալու համար:

«Մեր երկիրն ի վիճակի է օտարերկրացի գործընկերներին ելք ապահովել Եվրասիական տնտեսական միության վիթխարի շուկա: Դա, անտարակույս, բարձրացնում է նրա գրավչությունն առևտրատնտեսական և ներդրումային առումով»,­- ասել է Ալեքսանդր Լուկաշենկոն։

Այսինքն՝ օտարերկրացիների հետ առևտրատնտեսական ու հատկապես ներդրումների ներգրավման հարցում Հայաստանի հաղթաթուղթն օգտագործում է նաև Բելառուսը․ կարելի է ասել՝ մրցակցությունը թեժ է։

Գևորգ Ավչյան