29.07.2026 | 19:46
Ըմբիշ Ջանես Նազարյանը Բաքվում դարձավ աշխարհի Մ-17 չեմպիոն, Գևորգ Հարությունյանը՝ բրոնզե մեդալակիր. ՏԵՍԱՆՅՈՒԹ
Որոշումն ընդունված է. Թուրքիայի խորհրդարանական պատվիրակությունը կայցելի PKK-ի բանտարկված առաջնորդ Աբդուլլահ Օջալանին
Քաղաքականություն
21.11.2025 | 22:12
Թուրքիայի խորհրդարանական հանձնաժողովը քննարկել է Իմրալը կղզում բանտարկված Քրդական աշխատավորական կուսակցության (PKK) ղեկավար Աբդուլլահ Օջալանին այցելելու համար պատվիրակություն կազմելու անհրաժեշտությունը, որը համարվում է կառավարության՝ «ահաբեկչությունից զերծ Թուրքիա» նախաձեռնության հաջորդ քայլը, գրում Turkiye today-ը։
Նոյեմբերի 4-ին Թուրքիայի նախագահ Էրդողանի դաշնակից, «Ազգայնական շարժում» կուսակցության (MHP) առաջնորդ Դևլեթ Բահչելին կրկին կոչ էր արել հանձնաժողովին միջոցներ ձեռնարկել։ Նոյեմբերի 18-ին Բահչելին քննադատել էր առաջընթացի բացակայությունը և հայտարարել. «Եթե ոչ ոք չգնա, ես կվերցնեմ երեք գործընկերների և ինքս կգնամ»։
Դրանից հետո հանձնաժողովը հայտարարել էր, որ ուրբաթ նիստ կհրավիրի՝ որոշելու՝ թույլատրե՞լ պաշտոնական այցը, թե՞ ոչ։
Չորեքշաբթի երկրի նախագահ Ռեջեփ Թայիփ Էրդողանը կոչ էր արել կողմերին գործել «պատասխանատու և կառուցողական»՝ ասելով, որ հավատում է, որ հանձնաժողովը կկայացնի «ամենաճշգրիտ և օգտակար որոշումը» Թուրքիայի միասնության և անվտանգության համար։
Իղխող «Արդարություն և զարգացում» կուսակցության (ԱԶԿ) խորհրդարանական խմբակցության նախագահ Աբդուլլահ Գյուլերն աջակցություն է հայտնել այցի նախաձեռնությանը՝ ասելով, որ կուսակցությունն Իմրալըում հանդիպումը համարում է դրական քայլ և Թուրքիայի՝ ահաբեկչական խնդիրն արմատապես լուծելու վճռականության ապացույց։
MHP-ի փոխնախագահ Ֆեթի Յըլդըզը լրագրողներին ասել է, որ ինքը կներկայացնի իր կուսակցությունը Իմրալը կղզի այցելող հնարավոր պատվիրակության կազմում։
Թուրքիայի գլխավոր ընդդիմադիր Ժողովրդահանրապետական կուսակցությունը (CHP) հայտարարել է, որ չի մասնակցի այցին։ CHP-ի փոխնախագահ Մուրատ Էմիրն ասել է, որ կուսակցությունը նպատակահարմար չի համարում մասնակցել նման այցի։
Խորհրդարանական հանձնաժողովը բաղկացած է 51 օրենսդիրներից, այդ թվում՝ 22-ը՝ ԱԶԿ-ից, 11-ը՝ գլխավոր ընդդիմադիր Ժողովրդահանրապետական կուսակցությունից, 5-ը՝ քրդամետ DEM կուսակցությունից, 4-ը՝ «Ազգայնական շարժում»-ից և 8-ը՝ այլ կուսակցություններից։
Թարգմանությունը՝ Էմմա Չոբանյանի
