29.07.2026 | 16:41
Ովքեր են ԱԺ հանձնաժողովների ղեկավարի թեկնածուները․ Փաշինյանը ներկայացրեց ընտրության արդյունքները․ ՏԵՍԱՆՅՈՒԹ
Ճապոնիայում խոշոր հրդեհը 170 շենք է ոչնչացրել, մեկ մարդ զոհվել է․ ՏԵՍԱՆՅՈՒԹ
Քաղաքականություն
19.11.2025 | 14:16
Ճապոնիայի հարավային ափամերձ քաղաքում հրդեհը ոչնչացրել է ավելի քան 170 շենք, մեկ մարդ մահացել է։ Ռազմական և հրշեջ ուղղաթիռները փորձում են մարել գրեթե կես դարի ընթացքում երկրի ամենամեծ քաղաքային հրդեհը, գրում է Reuters-ը։
Օդից արված կադրերում երևում են ավերակների վերածված տներ և ծխի խիտ ամպեր, որոնք բարձրանում են Օիտա քաղաքի Սագանոսեկի շրջանից։ Տեղական լրատվամիջոցները հայտնում են, որ կրակը տարածվել է նաև մոտակա անտառապատ լանջերին և ափից մեկ կիլոմետրից ավելի հեռավորության վրա գտնվող անմարդաբնակ կղզում, հավանաբար, ուժեղ քամիների պատճառով։
Հրդեհը սկսվել է երեքշաբթի երեկոյան, այրվել է 48,900 քառակուսի մետր տարածք՝ մոտավորապես յոթ ֆուտբոլային դաշտի չափ, ինչի հետևանքով Տոկիոյից մոտ 770 կմ (478 մղոն) հարավ-արևմուտք գտնվող շրջանի 175 շենքերի բնակիչները ստիպված են եղել փախչել արտակարգ իրավիճակների համար նախատեսված ապաստարաններ։ Այս մասին հայտնել է Ճապոնիայի հրդեհների և աղետների կառավարման գործակալությունը։
Հրդեհի պատճառը հետաքննվում է։ Տեղական լրատվամիջոցները, հղում անելով ոստիկանության աղբյուրներին, հայտնում են, որ մեկ մարդ մահացած է գտնվել, իսկ 50-ամյա մի կին հոսպիտալացվել է թեթև այրվածքներով։
«Ես իմ խորին ցավակցությունն եմ հայտնում բոլոր բնակիչներին, ովքեր տարհանվում են։ Կառավարությունը կտրամադրի առավելագույն հնարավոր աջակցությունը՝ համագործակցելով տեղական իշխանությունների հետ»,- X-ում գրել է Ճապոնիայի վարչապետ Սանաե Տակաիչին։
Շենքերի քանակը և կրակի օղակում հայտնված տարածքն այս հրդեհը դարձնում են Ճապոնիայում ամենամեծ քաղաքային հրդեհը 1976 թվականի Սակատայի հրդեհից ի վեր, չհաշված երկրաշարժի հետ կապված հրդեհները։
2016 թվականին Իտոիգավայի հրդեհը ոչնչացրել էր 147 շենք և հիմնահատակ ավերել շուրջ 40,000 քառակուսի մետր տարածք։ Զոհեր չէին եղել։
Թարգմանությունը՝ Էմմա Չոբանյանի
