05.12.2025 | 23:01
Եվրոպական հանձնաժողովը 120 միլիոն եվրոյով տուգանել է Իլոն Մասկի X-ին
«Թրամփի երթուղին» խթանում է ԱՄՆ-ին՝ ավելի մեծ ուշադրություն դարձնել Հարավային Կովկասին․ ամերիկացի փորձագետ
Քաղաքականություն
18.11.2025 | 12:43
Ռուսաստանի և Ադրբեջանի հարաբերություններում լարվածությունը նպաստել է ադրբեջանա-ամերիկյան հարաբերությունների բարելավմանը։ Ադրբեջանական լրատվամիջոցների հաղորդմամբ՝ այս մասին հայտարարել է ամերիկյան Atlantic Council-ի Եվրասիայի բաժնի գլխավոր տնօրեն, Ուկրաինայում և Ուզբեկստանում ԱՄՆ նախկին դեսպան Ջոն Հերբստը՝ Ադրբեջան-ԱՄՆ վերլուծական կենտրոնների առաջին ֆորումի ժամանակ։
«AZAL-ի օդանավի խոցումը և այդ փաստի ժխտումը, Ռուսաստանում ադրբեջանցի գործարարների նկատմամբ բացասական վերաբերմունքը և մի շարք այլ նմանատիպ գործոններ է՛լ ավելի են սերտացնում Ադրբեջանի և Միացյալ Նահանգների հարաբերությունները»,- ասել է Հերբստը։
Նա նշել է, որ «Թրամփի երթուղին» Միացյալ Նահանգներին խթանում է ավելի մեծ ուշադրություն դարձնել Հարավային Կովկասին, և որ Ադրբեջանի, Հայաստանի և Թուրքիայի հարաբերություններն այստեղ մեծ նշանակություն ունեն։
Ամերիկացի փորձագետն ընդգծել է, որ ԱՄՆ-ի հարաբերությունների ամրապնդումն Ադրբեջանի և Հայաստանի հետ նպաստում է տարածաշրջանային համագործակցությանը։ Նրա խոսքով՝ օգոստոսի 8-ին Վաշինգտոնում ստորագրված համատեղ հայտարարությունը պայմաններ է ստեղծում փոխադարձ զիջումների և Բաքվի ու Երևանի շահերի առաջխաղացման համար։
«Այսօր Թրամփի վարչակազմը լրջորեն կենտրոնացած է Հարավային Կովկասի և Կենտրոնական Ասիայի վրա։ Վաշինգտոնն աշխատում է ամրապնդել հարաբերությունները և՛ Ադրբեջանի, և՛ Հայաստանի հետ։ Սա նպաստում է տարածաշրջանային կապերին, տնտեսական համագործակցությանը և անվտանգության ոլորտում համագործակցությանը»,- նշել է Հերբստը։
Նա նաև ընդգծել է Թուրքիայի և Հայաստանի հարաբերությունների կարգավորման կարևորությունն ամբողջ տարածաշրջանի կայունության համար։ Խոսելով ԱՄՆ-ի և Թուրքիայի համագործակցության մասին՝ նա նշել է, որ Թուրքիայի նախագահը դժվար գործընկեր է։ Այնուամենայնիվ, Վաշինգտոնի ու Անկարայի շահերը համընկնում են Մերձավոր Արևելքում և Հարավային Կովկասում։
Թարգմանությունը՝ Էմմա Չոբանյանի
