Քաղաքականություն
18.11.2025 | 12:26
ՌԴ Օմսկի մարզի Ռոստովկա բնակավայրի մոտակայքում գտնվող դաշտում գազատարի արտահոսք է տեղի ունեցել, ինչի հետևանքով հրդեհ է բռնկվել։ Այս մասին հայտնել է մարզի նահանգապետ Վիտալի Խոցենկոն, գրում է Meduza-ն։
Նա պարզաբանել է, որ վթարը տեղի է ունեցել գլխավոր գազատարի ստորգետնյա հատվածում։ Նախնական տեղեկությունների համաձայն՝ տուժածներ չկան։
Ռոստովկա գյուղի բնակիչները Shot տելեգրամ ալիքին հայտնել են, որ Վրուբելևո բնակելի թաղամասի մոտակայքում տեղի է ունեցել հզոր պայթյուն։ Այն լսել են բնակավայրերում, իսկ հրդեհը տեսանելի է եղել մի քանի կիլոմետրերի վրա։
Օմսկի մարզի քննչական կոմիտեն հայտնել է, որ հրդեհի հետ կապված նախաքննություն է անցկացնում։
Ըստ ուժայիններին մոտ կանգնած «112» տելեգրամ ալիքի՝ գազատարի վրա պայթյունը տեղի է ունեցել վերանորոգման աշխատանքների ժամանակ։ Աշխատանքները կատարվել են Ռոստովկա գյուղի մոտակայքում գտնվող դաշտի ստորգետնյա հատվածում։ Որոշ արդյունաբերական ձեռնարկություններ անջատվել են գազամատակարարումից։
«Գազպրոմի» մասնագետները գնահատում են, որ վերականգնումը կտևի մինչև 24 ժամ։
Թարգմանությունը՝ Էմմա Չոբանյանի
