ՀԷՑ-Ի ժամանակավոր կառավարչի կողմից ներկայացված բացատրությունները չեն դիտարկվել որպես վկայի ցուցմունք․ ՏԵՍԱՆՅՈՒԹ

«ՀԷՑ-ին առնչվող վարույթի շրջանակում ինքնուրույն քանի՞ գործողություն է կատարվել, այսինքն՝ ոչ թե առկա նյութերի ուսումնասիրություն, այլ ինքնուրույն փաստերի ճշտմանն ուղղված գործողություններ»,- Հանրային ծառայությունները կարգավորող հանձնաժողովի նիստին ՀԷՑ-ին առնչվող վարույթի մասին հանձնաժողովի աշխատակազմին հարց ուղղեց փաստաբան Արամ Օրբելյանը։

Հանձնաժողովի աշխատակազմի իրավաբանական և լիցենզավորման վարչության պետ Հայրապետ Կարապետյանի խոսքով՝ հարցը վարույթի ընթացակարգը մանրամասնելու մասին է։

«Հստակ արդեն մի քանի անգամ նշվեց, որ իրականացվել են թվով երեք մոնիտորինգներ, ներկայացված տեղեկատվություններին կից եղել են փաստական տվյալներ, որոնք որպես ընկերության ներկայացուցչի կողմից ներկայացված տվյալներ դիտարկվել են։ Այլ տվյալների մասով՝ պարզման գործողություններ իրականացնելու անհրաժեշտություն եղել է, Հանձնաժողովի աշխատակազմը իրականացրել է դրանց պարզմանն ուղղված գործողություններ։ Դրանց, ըստ էության, կարող էին ծանոթանալ ներկայացուցիչները՝ վարույթի նյութերին ծանոթանալով։ Ավելացնելու այլ բան, ըստ էության, չունեմ»,- ասած Կարապետյանը։

Օրբելյանն էլ արձանագրեց, որ հանձնաժողովի աշխատակազմը որևէ հավելյալ գործողություն չի կատարվել։ Փաստաբանը նաև հետաքրքրվեց՝ որևէ վկա վարույթի շրջանակներում հարցաքննվել է։

«Վարույթի ընթացքում ժամանակավոր կառավարչի կողմից ներկայացված բացատրությունները Հանձնաժողովի կողմից չեն դիտարկվել որպես վկայի ցուցմունք, դրանք դիտարկվել են բացատրություններ, որպիսի ապացույցի տեսակը նախատեսված է «Վարչարարության հիմունքների և վարչական վարույթի մասին» օրենքով»,- ասաց ՀԾԿՀ ներկայացուցիչը։
Մանրամասները՝ տեսանյութում։