Տնտեսություն
12.11.2025 | 23:13
ՀՀ էկոնոմիկայի նախարարի տեղակալ Արման Խոջոյանը նոյեմբերի 12-ին հանդիպել է Սլովենիայի դեսպան Մատեյա Պրևոլշեկին։ Զրուցակիցները քննարկել են Հայաստանի և Սլովենիայի միջև տնտեսական համագործակցության խորացման, ներդրումային միջավայրի բարելավման և առևտրաշրջանառության աճի հնարավորությունները՝ հատուկ ուշադրություն դարձնելով դեղագործության, շինարարության և գյուղատնտեսության ոլորտներին։ Այս մասին տեղեկացնում են ՀՀ էկոնոմիկայի նախարարությունից։
«Քննարկվել են երկու երկրների միջև տնտեսության ոլորտում համագործակցության ընդլայնման և առևտրաշրջանառության ավելացման հեռանկարները։
Արման Խոջոյանը ներկայացրել է ՀՀ էկոնոմիկայի նախարարության կողմից մշակված ներդրումային քաղաքականության հայեցակարգը, Հայաստանի գործարար և ներդրումային միջավայրը, ինչպես նաև ներդրումների ներգրավման տեսանկյունից գրավիչ ոլորտները։ Պայմանավորվածություն է ձեռք բերվել սլովենական կողմին տրամադրել Հայաստանի տնտեսական հեռանկարները փաստաթուղթը և երկու երկրների գործարար համայնքների միջև կազմակերպել հանդիպումներ և համաժողովներ։
Անդրադարձ է կատարվել երկկողմ հարաբերությունների զարգացմանը այնպիսի առանցքային ոլորտներում, ինչպիսիք են՝ դեղագործությունը, շինարարությունը և գյուղատնտեսությունը։ Սլովենական կողմը հետաքրքրություն է ցուցաբերել զարգացնել ալկոհոլային խմիչքների արտադրության ոլորտում համագործակցությունը, մասնավորապես՝ «Հայկական բրենդիի» արտահանումը խթանելու և սլովենական շուկայում շուկայահանելու հնարավորությունները։
Երկուստեք կարևորվել է օգոստոսի 8-ին Վաշինգտոնում ստորագրված համատեղ Հռչակագիրը, որով նշանավորում է տարածաշրջանում խաղաղության հաստատումը։ Ընդգծվել է, որ տրանսպորտային կապուղիների ամբողջական ապաշրջափակումը՝ միջազգային իրավունքի հանրահայտ սկզբունքների հարգմամբ, «Խաղաղության խաչմերուկ» նախաձեռնության և TRIPP նախագծի իրագործումը խթան կհանդիսանան տնտեսական աճի և կայունության համար»,- ասված է հաղորդագրությունում։
