05.10.2026 | 19:01
Միրզոյան–Ղալիբաֆ հանդիպմանը կարևորվել է Հայաստան–Իրան ռազմավարական համագործակցության խորացումը
Դատավոր Արմինե Սաֆարյանին կարգապահական պատասխանատվության ենթարկելու միջնորդությունը մերժվել է․ դատավորը հրաժարականի դիմում է ներկայացրել
Հասարակություն
10.11.2025 | 19:20
Բարձրագույն դատական խորհուրդը մերժել է դատավոր Արմինե Սաֆարյանին կարգապահական պատասխանատվության ենթարկելու վերաբերյալ արդարադատության նախարար Սրբուհի Գալյանի միջնորդությունը։ ԲԴԽ նախագահ Արթուր Աթաբեկյանը որոշումը հրապարակելիս պարզաբանեց․ դատավորը հրաժարականի դիմում է ներկայացրել, և նրա լիազորությունները դադարել են։
Հետաքրքիր է այն հանգամանքը, որ դատավորը դիմումը ներկայացրել էր իրեն կարգապահական պատասխանատվության ենթարկելու ԲԴԽ որոշման հրապարակումից առաջ, ամենայն հավանականությամբ, չցանկանալով հնարավոր պատասխանատվության ենթարկվել ու կագապահական տույժի միջոցով ազատվել դատավորի պաշտոնից։
Խնդիրն այն է, որ Սաֆարյանն ամիսներ առաջ մեկ այլ կարգապահական գործով «խիստ նկատողություն» տույժի է ենթարկվել, որը դեռևս չի մարվել։ Չմարված «խիստ նկատողություն» կարգապահական տույժ ունենալու դեպքում ցանկացած, նույնիսկ ամենամեղմ կարգապահական տույժը, ըստ «Դատական օրենսգիրք» սահմանադրական օրենքի, հանգեցնում է դատավորի լիազորությունների դադարեցման։
Այսինքն՝ ԲԴԽ-ի կողմից դատավորի նկատմամբ ցանկացած տույժի կիրառումն ինքնին հանգեցնելու էր նրա լիազորությունների դադարեցման։
ԲԴԽ որոշումը՝ այստեղ։
Արաքս Մամուլյան
