05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Փաշինյանից հրահանգներ sms-ո՞վ, թե՞ զանգով. վարչապետի ստատուսներն ու իրավապահների արագ արձագանքները․ ՏԵՍԱՆՅՈՒԹ
Քաղաքականություն
10.11.2025 | 18:30
Քննչական կոմիտեի ղեկավար Արթուր Պողոսյանը ծիծաղով է արձագանքում հարցին՝ վարչապետ Նիկոլ Փաշինյանից հեռախոսո՞վ, թե՞ մեյլով է հրահանգներ ստանում։
Հարցը, սակայն, անկրակ չէ․ հատկապես վերջին շրջանում Փաշինյանի ելույթներից և ֆեյսբուքյան գրառումներից հետո իրավապահները, կարծես շատ պատահականորեն, գործողություններ են սկսում այն անձանց դեմ, որոնց անունը շոշափվում է վարչապետի գրառումներում։
Փաշինյանը մեկ տասնյակի հասնող գրառումներ էր արել ինչպես Սամվել Կարապետյանի և Միքայել արքեպիսկոպոս Աջապահյանի նկատմամբ քրեական հետապնդում սկսելուց առաջ, այնպես էլ իրավապահների գործողությունների ընթացքում. «Պոռնկաբարո «հոգեւորականներն» ու նրանց պոռնկաբարո «բարեգործներն» ինչու՞ են ակտիվացել։ Ոչինչ՝ նորից կպասիվացնենք։ Ընդ որում՝ ընդմիշտ»։
Այս գրառումից րոպեներ անց իրավապահներն արդեն Սամվել Կարապետյանի առանձնատանն էին։ Հնարավո՞ր է փոխկապակցված գործողությունները պարզապես պատահականություն լինեին։
Իշխող պատգամավորի մատնանշած՝ զանգել-հրահանգելու դեպքեր, սակայն, եղել են, ավելին՝ Փաշինյանի իշխանության հենց առաջին ամիսներին։ 2018 թվականի դեկտեմբերի 5-ին համացանցում ձայնագրություն տարածվեց, որտեղ այն ժամանակ ԱԱԾ տնօրենի պաշտոնը զբաղեցնող Արթուր Վանեցյանը Փաշինյանի հետ հեռախոսով քննարկում է Հայաստանի երկրորդ նախագահ Ռոբերտ Քոչարյանի և ՀԱՊԿ նախկին գլխավոր քարտուղար Յուրի Խաչատուրովի խափանման միջոցի ընտրության հարցը։
Ոչ միայն գրառումներով, նաև հարցազրույցի ժամանակ է վարչապետը մատնանշել ընդդիմադիր գործիչներին։ Փաստաբան Միհրան Պողոսյանը հիշեցնում է 2019 թվականի հուլիսի Փաշինյանի հարցազրույցը։ Այս հայտարարությունից հինգ ամիս անց Թովմասյանին մեղադրանք առաջադրվեց։
Ոչ միայն հրապարակային գրառումներով, այլև հեռախոսազանգերով և շատ ու շատ այլ միջոցներով է իրավապահ համակարգին հրահանգներ իջնում, ընդգծում է Գյումրիի «Ասպարեզ» մամուլի ակումբի խորհրդի նախագահ Լևոն Բարսեղյանը։ Նա չի բացառում նաև, որ Փաշինյանը ոչ պաշտոնապես քարոզարշավ է սկսել։
Հրահա՞նգ է իշխանության կողմից, զուտ զուգադիպությո՞ւն, թե՞ գործադիր մարմնի ղեկավարին զեկուցում են իրավապահ մարմինների կողմից իրականացվելիք բոլոր գործողությունների մասին, կարծիքները ոչ միանշանակ են։ Սակայն անցնող 7 տարիները ցույց են տալիս, որ Փաշինյանը բավական տեղեկացված է այն ամենից, ինչը դուրս է վարչապետի լիազորությունների շրջանակից։
Մանրամասները՝ տեսանյութում։
Ռոզա Վարդանյան
