Պատժամիջոցների պատճառով «Լուկօյլ»-ը դադարեցնում է կասպիական հանքավայրերից նավթի մատակարարումը Բաքվի նավահանգիստ

Նոյեմբերին «Լուկօյլ»-ը կդադարեցնի իր կասպիական հանքավայրերից Բաքվի նավահանգիստ հում նավթի առաքումները՝ պատժամիջոցների պատճառով, և վերբեռնումը կսկսի Ռուսաստանի Մախաչկալա նավահանգստով՝ Նովոռոսիյսկով հետագա արտահանման համար, հայտնել են Reuters-ին երկու արդյունաբերական աղբյուրներ, գրում է The Moscow Times-ը։

«Լուկօյլ»-ը դժվարությունների է բախվում միջազգային բիզնեսներում գործունեությունը շարունակելու հարցում այն բանից հետո, երբ ԱՄՆ-ը և Մեծ Բրիտանիան հոկտեմբերին պատժամիջոցներ կիրառեցին Ռուսաստանի երկրորդ խոշորագույն նավթային ընկերության նկատմամբ: ԱՄՆ ֆինանսների նախարարությունն ընկերություններին մինչև նոյեմբերի 21-ը ժամանակ է տվել՝ «Լուկօյլ»-ի և «Ռոսնեֆտ»-ի հետ ցանկացած գործարք դադարեցնելու համար։

«Լուկօյլ»-ը նավթ է արդյունահանում Կասպից ծովի երկու ծովային հանքավայրերում՝ «Ֆիլանովսկի»-ում և «Կորչագին»-ում: Այս նավթը նախկինում արտահանվում էր Բաքու-Թբիլիսի-Ջեյհան (BTC) խողովակաշարով՝ BTC Blend որակով: Սակայն, սկսած 2022 թվականից, ընկերությունը ստիպված էր դադարեցնել մատակարարումները խողովակաշարով, որը պատկանում է օտարերկրյա ընկերությունների, այդ թվում՝ բրիտանական BP ընկերությանը: «Լուկօյլ»-ը ստիպված էր փոխարինել այս առաքումներն ադրբեջանական SOCAR-ին պատկանող նավթավերամշակման գործարաններ առաքումներով:

«Լուկօյլ»-ը նաև իր կասպյան հանքավայրերից նավթ է ուղարկում Կասպյան խողովակաշարերի կոնսորցիումի (CPC) համակարգ:

Նոյեմբերին «Լուկօյլ»-ը Մախաչկալա կհասցնի մոտ 30,000 տոննա հում նավթ, իսկ հաջորդ ամսվանից Բաքու առաքվող հում նավթի ամբողջ ծավալը՝ մոտ 130,000 տոննա, կուղղորդի ռուսական նավահանգիստ, հայտնում են աղբյուրները։

«Լուկօյլ»-ը չի արձագանքել Reuters-ի  մեկնաբանության հարցմանը։

Ընկերությունը, հում նավթից բացի, Մախաչկալա-Նովոռոսիյսկ երթուղով ամսական տեղափոխվում է նաև մոտ 170,000 տոննա ղազախական նավթ, որն առաքվում է Ակտաու նավահանգստից։ Աղբյուրները նշում են, որ այս երթուղով ղազախական նավթի ծավալը չի ​​նվազի։

«Ակտաուից Մախաչկալա ղազախական նավթ տեղափոխող տանկերային նավերը մեկնում են սովորականի պես»,- ասել է արդյունաբերության աղբյուրը։

Թարգմանությունը՝ Էմմա Չոբանյանի