28.04.2026 | 23:24
Երևանում երթևեկության փոփոխություն կկատարվի
Որոշում է կայացվել հոսպիտալացնել Վարդան Ղուկասյանին. փաստաբան
Քաղաքականություն
06.11.2025 | 23:31
Որոշում է կայացվել հոսպիտալացնել Գյումրիի քաղաքապետ Վարդան Ղուկասյանին։ Այս մասին հայտնել է նրա պաշտպան Զարուհի Փոստանջյանը։
Ավելի վաղ նա հայտնել էր, որ այսօր կտրուկ վատացել է «Կենտրոն» քրեակատարողական հիմնարկում գտնվող Վարդան Ղուկասյանի առողջական վիճակը։
Քրեակատարողական հիմնարկի անձնակազմը անմիջապես հրավիրել է շտապ բժշկական օգնություն, և Վարդան Ղուկասյանը տեղափոխվել է «Սուրբ Գրիգոր Լուսավորիչ» բժշկական կենտրոն։
Հիշեցնենք՝ Գյումրիի քաղաքապետ Վարդան Ղուկասյանը երկու ամսով կալանավորվել էր։
Հիշեցնենք՝ Ազգային անվտանգության ծառայության և Ոստիկանության աշխատակիցները խուզարկություն էին իրականացրել Գյումրիի քաղաքապետարանում, ինչից հետո քաղաքապետ Ղուկասյանը և քաղաքապետարանի 7 աշխատակից ձերբակալվել էին։ Ավելի ուշ Հակակոռուպցիոն կոմիտեն հայտարարել էր, որ նրանք ձերբակալվել են մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով։
Բացի հաղորդագրությունը, Կոմիտեն նաև գաղտնալսումներով տեսանյութ էր հրապարակել՝ այն վերագրելով Վարդան Ղուկասյանին և Գյումրիի գլխավոր ճարտարապետ Հենրիկ Գասպարյանին։ Ըստ Հակակոռուպցիոն կոմիտեի` Գյումրու համայնքի ղեկավարն ու գլխավոր ճարտարապետը, տեղեկանալով այն մասին, որ քաղաքացին Գյումրու Գարեգին Նժդեհ փողոցի 1/9 հասցեում կառուցել է շուրջ 1500 քառակուսի մետր մակերեսով ինքնակամ շինություն, որը ենթակա է եղել քանդման, եկել են նախնական համաձայնության՝ քաղաքացու հետ կոռուպցիոն գործարքի։ Դրա դիմաց խոստացել են կառուցված ինքնակամ շինության քանդման ուղղությամբ միջոցներ չձեռնարկել։ Ավելին` կազմել են պաշտոնական կեղծ փաստաթղթեր այն մասին, որ շինությունը, իբրև թե, քանդվել է, նորը կառուցվել, այդպիսով օրինականացվել է այն՝ դրա դիմաց պահանջելով խոշոր չափի՝ 4 մլն դրամի կաշառք։
Առաջադրված մեղադրանքը Վարդան Ղուկասյանը չի ընդունում։
