29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
ԵՄ-ն պատրաստվում է ավելի խստացնել ՌԴ քաղաքացիների համար վիզայի տրամադրումը
Քաղաքականություն
06.11.2025 | 18:49
Եվրամիությունը պատրաստվում է կրկին խստացնել Ռուսաստանի քաղաքացիների համար վիզայի տրամադրման կանոնները: Politico-ն, հղում անելով երեք եվրոպացի պաշտոնյաների, հաղորդում է, որ նոր կանոնները փաստացի կդադարեցնեն բազմակի մուտքի վիզաների տրամադրումը: Ռուսները կկարողանան ստանալ միայն մեկանգամյա մուտքի վիզաներ՝ բացառությամբ մարդասիրական նպատակներով տրամադրվող վիզաների, գրում է The Insider-ը։
2022 թվականին Ռուսաստանի կողմից Ուկրաինա լայնածավալ ներխուժումից հետո ԵՄ-ն չեղյալ է հայտարարել Ռուսաստանի հետ մինչ այդ գործող վիզային ռեժիմի դյուրացման համաձայնագիրը։ Դրանից հետո վիզա ստանալը դարձել է ավելի թանկ և դժվար։ ԵՄ որոշ անդամ պետություններ (Բալթյան երկրները, Չեխիան և Նիդերլանդները) ամբողջությամբ դադարեցրել են վիզաների տրամադրումը ռուսներին։
Ըստ Politico-ի՝ վիզաների տրամադրումն ազգային իշխանությունների պատասխանատվությունն է, ինչը նշանակում է, որ Եվրահանձնաժողովը չի կարող ռուս զբոսաշրջիկների համար մուտքի ամբողջական և համապարփակ արգելք կիրառել, բայց դա կարող է բարդացնել գործընթացը։
Եվրոպական հանձնաժողովի տվյալներով՝ 2024 թվականին կես միլիոնից ավելի ռուսներ են ստացել շենգենյան վիզաներ՝ նախապատերազմյան մակարդակից ցածր, բայց նախորդ տարվա համեմատ՝ ավելի բարձր։ Համեմատության համար՝ 2019 թվականին ռուսներին տրամադրվել է ավելի քան 4 միլիոն վիզա։
Կրեմլն էլ ենթադրում է, որ ԵՄ-ն լրացուցիչ սահմանափակումներ կկիրառի Ռուսաստանի քաղաքացիների նկատմամբ՝ նոր տարրեր ավելացնելով առճակատմանը։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Դիվանագետներն արդեն պարտավոր են տեղեկացնել, ինչը նշանակում է, որ նրանց տեղաշարժը Շենգենյան գոտում արդեն իսկ սահմանափակված է: Միանգամայն հնարավոր է, որ եվրոպացիները լրացուցիչ սահմանափակումներ կկիրառեն Ռուսաստանի քաղաքացիների նկատմամբ»,- լրագրողներին ասել է Պեսկովը՝ մեկնաբանելով ԵՄ-ի ծրագրերը՝ խստացնելու ՌԴ քաղաքացիների համար վիզային կարգավորումները և դադարեցնելու բազմակի մուտքի շենգենյան վիզաների տրամադրումը։
Նրա խոսքով՝ եվրոպացիները «ջանասիրաբար հիշում են Սառը պատերազմի ժամանակ տեղի ունեցած առճակատման հետ կապված ամեն ինչ և նույնքան ջանասիրաբար նոր տարրեր են ավելացնում այս առճակատմանը»։
«Նրանք պատեր են կառուցում, նրանք չեն մոռացել, թե ինչպես։ Պատմությունն ամեն ինչ իր տեղը կդնի»,- հավելել է Կրեմլի խոսնակը։
Թարգմանությունը՝ Էմմա Չոբանյանի
