09.06.2026 | 15:50
Ընտրակաշառքի համար՝ բանտ մինչև հաջորդ ընտրություններ․ Փաշինյանի հանձնարարականը․ ՏԵՍԱՆՅՈՒԹ
ՌԴ-ն ԱՄՆ-ից որևէ պարզաբանում չի ստացել միջուկային փորձարկումների մասին Թրամփի հայտարարությունների վերաբերյալ․ Պեսկով
Քաղաքականություն
05.11.2025 | 19:19
Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Մոսկվան Վաշինգտոնից որևէ պարզաբանում չի ստացել ԱՄՆ նախագահ Դոնալդ Թրամփի՝ միջուկային փորձարկումների մասին հայտարարությունների վերաբերյալ, գրում է Ինտերֆաքսը։
Լրագրողների հարցին՝ արդյո՞ք Մոսկվան ունի «հստակություն այն մասին, թե կոնկրետ ինչ է ԱՄՆ-ը մտադիր փորձարկել», Պեսկովը դարձյալ բացասական պատասխան է տվել։
Բացի այդ, նա հայտնել է, որ Ռուսաստանը չի փոխանցում Վաշինգտոնին շփման գծի ռուսական քարտեզները, ինչը եղել է նախկինում։
«Մենք դրանք հիմա չենք փոխանցում։ Երբ շփումներ են եղել, իհարկե, քարտեզների վերաբերյալ պարզաբանումներ են տրվել»,- ասել է Պեսկովը։
Հավելենք, որ հոկտեմբերի վերջին Թրամփը հայտարարել էր, որ Պենտագոնին հրամայել է անհապաղ սկսել միջուկային զենքի փորձարկումները։ Դրանից հետո էլ ԱՄՆ նախագահը նշել էր, որ մի շարք երկրներ, այդ թվում՝ ՌԴ-ն ու Չինաստանը, միջուկային զենքի գաղտնի փորձարկումներ են արել։
«Մենք փորձարկելու ենք միջուկային զենք, ինչպես մյուս երկրները։ Ռուսաստանը փորձարկում է, Չինաստանը փորձարկում է, բայց նրանք դրա մասին չեն խոսում։ Գիտեք՝ մենք բաց հասարակություն ենք։ Մենք տարբեր ենք։ Մենք խոսում ենք դրա մասին»,- հայտարարել էր Թրամփը։
Թարգմանությունը՝ Էմմա Չոբանյանի
