Պեկինն արձագանքել է միջուկային զենքի գաղտնի փորձարկումների մասին Թրամփի հայտարարությանը

Չինաստանը հայտարարել է, որ հավատարիմ է միջուկային զենքի վերաբերյալ իր միջազգային պարտավորություններին, այն բանից հետո, երբ ԱՄՆ նախագահ Դոնալդ Թրամփը նշել է, որ Պեկինն այն մի քանի տերություններից մեկն է, որոնք միջուկային զենքի գաղտնի փորձարկումներ են անցկացրել, գրում է Newsweek-ը։

Թրամփը հայտարարել է՝ ԱՄՆ-ը կրկին կսկսի միջուկային զենքի փորձարկումներ, ինչը լուրջ սրացում կլինի զարգացող սպառազինությունների մրցավազքի և տասնամյակների վաղեմության միջազգային պարտավորությունների խախտում։

«Մենք փորձարկելու ենք միջուկային զենք, ինչպես մյուս երկրները։ Ռուսաստանը փորձարկում է, Չինաստանը փորձարկում է, բայց նրանք դրա մասին չեն խոսում։ Գիտեք՝ մենք բաց հասարակություն ենք։ Մենք տարբեր ենք։ Մենք խոսում ենք դրա մասին»,- հայտարարել է Թրամփը։

Ի պատասխան Թրամփի այս հայտարարության՝ Չինաստանի ԱԳՆ խոսնակ Մաո Նինգն ասել է․ «Որպես ՄԱԿ-ի Անվտանգության խորհրդի մշտական ​​անդամ և պատասխանատու միջուկային զենք ունեցող պետություն՝ Չինաստանը միշտ հավատարիմ է եղել խաղաղ զարգացման ուղուն, պահպանել է միջուկային զենքն առաջինը չօգտագործելու քաղաքականությունը, հետապնդել է ինքնապաշտպանական միջուկային ռազմավարություն և հավատարմորեն պահպանել է միջուկային փորձարկումները դադարեցնելու իր պարտավորությունը։ Մենք պատրաստ ենք համագործակցել բոլոր կողմերի հետ՝ պաշտպանելու Միջուկային փորձարկումների համապարփակ արգելման մասին պայմանագրի (CTBT) հեղինակությունը և պահպանելու միջազգային միջուկային զինաթափման և չտարածման ռեժիմը»։

Նա նաև հույս է հայտնել, որ «ամերիկյան կողմը ջանասիրաբար կկատարի իր պարտավորությունները և միջուկային փորձարկումները կասեցնելու հանձնառությունը, կձեռնարկի կոնկրետ գործողություններ՝ միջազգային միջուկային զինաթափման և չտարածման ռեժիմը պահպանելու, ինչպես նաև համաշխարհային ռազմավարական հավասարակշռությունն ու կայունությունը պահպանելու համար»։

Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր, որ Պենտագոնին հանձնարարել է միջուկային զենքի փորձարկումներ սկսել։

Թարգմանությունը՝ Էմմա Չոբանյանի