01.05.2026 | 19:40
«Ես խնդիր ունեմ». ինքնավնասումների շղթա՝ ՔԿՀ-ում. ՏԵՍԱՆՅՈՒԹ
Մակրոնի խորհրդականը Բաքվում է՝ Ադրբեջանի հետ հարաբերությունները, տարածաշրջանային հարցեր քննարկելու նպատակով
Քաղաքականություն
05.11.2025 | 14:48
Բաքվում հաջող բանակցություններ են տեղի ունեցել ֆրանսիացի և ադրբեջանցի դիվանագետների միջև։ Այս մասին սոցիալական ցանցերում գրել է Ադրբեջանում Ֆրանսիայի դեսպան Սոֆի Լագուտը, փոխանցում են ադրբեջանական լրատվամիջոցները։
Դեսպանը հայտնել է, որ բանակցություններն Ադրբեջանի և Ֆրանսիայի նախագահների միջև վերջերս կայացած հանդիպումների շարունակությունն են։
«Ֆրանսիայի նախագահի եվրոպական հարցերով դիվանագիտական խորհրդական Բերտրան Բուխվալտերը և Ֆրանսիայի արտաքին գործերի նախարարության եվրոպական հարցերով դեպարտամենտի տնօրեն Բրիս Ռոքֆոյը ժամանել են Բաքու՝ ադրբեջանա-ֆրանսիական հարաբերությունները և տարածաշրջանային հարցերը քննարկելու Ադրբեջանի Հանրապետության նախագահի օգնական և նախագահի աշխատակազմի արտաքին քաղաքականության բաժնի ղեկավար Հիքմաթ Հաջիևի և նախագահի հատուկ հանձնարարությունների գծով հատուկ ներկայացուցիչ Էլչին Ամիրբեկովի հետ»,- հավելել է դեսպանը։
Հավելենք, որ ավելի վաղ Ադրբեջանի նախագահ Իլհամ Ալիևն ընդունել էր Բաքվում Ֆրանսիայի նորանշանակ արտակարգ և լիազոր դեսպան Սոֆի Լագուտի հավատարմագրերը։ Նա ընդգծել էր Ֆրանսիայի նախագահ Էմանուել Մակրոնի հետ Կոպենհագենում կայացած հանդիպումը՝ նշելով, որ դրա արդյունքում երկու երկրների միջև թյուրըմբռնումների պատճառ դարձած հարցերն անցյալում են մնացել։
Թարգմանությունը՝ Էմմա Չոբանյանի
