Էլեկտրամեքենայի անլար լիցքավորում՝ ճանապարհից․ Գերմանիայում նոր տեխնոլոգիա են ներդրել

Գերմանիայում ներդրվել է ճանապարհից էլեկտրամեքենայի անլար լիցքավորման տեխնոլոգիա, գրում է DW-ի ռուսական ծառայությունը։

Նշվում է, որ Ամբերգի մոտ գտնվող A6 ավտոմայրուղում սկսվել է ինդուկտիվ լիցքավորման փորձարկման փուլը: Ասֆալտի տակ տեղադրված են հարթ պարույրներ, որոնք ստեղծում են էլեկտրամագնիսական դաշտ և լիցքավորում են էլեկտրական մեքենաների մարտկոցները հենց ընթացքի ժամանակ: Փորձարկումներում ներգրավվել են ինչպես մարդատար, այնպես էլ էլեկտրական բեռնատարներ: Տրանսպորտային միջոցները լիցքավորման համար պետք է ընթանան 80-ից 120 կմ/ժ արագության միջակայքում:

Փորձարկման 1 կիլոմետրանոց ուղին առաջինն է Գերմանիայում և աշխարհում քչերից մեկը։ Նմանատիպ նախագծեր կան Ֆրանսիայում, Սկանդինավյան երկրներում և Միացյալ Նահանգներում։ Մասնագետները կարծում են, որ տեխնոլոգիան կօգնի էլեկտրական տրանսպորտային միջոցները դարձնել ավելի թեթև և էժան, քանի որ էներգիայի մի մասը կարող է վերականգնվել անմիջապես ճանապարհից, այլ ոչ թե կուտակվել ծանր մարտկոցներում։ Ինդուկտիվ լիցքավորման հնարավորությունը կարող է մարտկոցի քաշը կրճատել 50-80%-ով՝ նվազեցնելով ծախսերը և էլեկտրական տրանսպորտային միջոցները դարձնելով էկոլոգիապես ավելի մաքուր։

Լիցքավորման էներգիան ստացվում է վերականգնվող աղբյուրներից և փոխանցվում է մարտկոցներին միայն այն ժամանակ, երբ մեքենան գտնվում է անմիջապես պարույրի վերևում: Սա բացառում  է կորուստները և գործընթացը դարձնում անվտանգ: Մագնիսական դաշտը չի գերազանցում թույլատրելի սահմանները և չի ազդում կարդիոստիմուլյատորների կամ այլ բժշկական սարքերի վրա:

Electreon Germany-ն, համագործակցելով Նյուրնբերգի համալսարանի հետ, շարունակում է մշակել տեխնոլոգիան և պլանավորում է նոր փորձարկումներ բեռնատարների կողմից ծանրաբեռնված ճանապարհներին:

Թարգմանությունը՝ Էմմա Չոբանյանի