Քեոփսի բուրգի մոտ բացվել է Մեծ եգիպտական թանգարանը՝ աշխարհի ամենամեծ հնագիտական թանգարանը

Եգիպտոսում՝ Կահիրեի արևմուտքում գտնվող Գիզայի Քեոփսի բուրգի հարևանությամբ, նոյեմբերի 1-ին տեղի է ունեցել Մեծ եգիպտական թանգարանի բացման արարողությունը։ Այն համարվում է աշխարհի ամենամեծ թանգարանը, որը նվիրված է մեկ քաղաքակրթությանը։

Թանգարանում ցուցադրվել է շուրջ 100 հազար ցուցանմուշ, որոնք ընդգրկում են Եգիպտոսի յոթ հազարամյակների պատմությունը՝ նախաարքայական ժամանակաշրջանից մինչև հույն-հռոմեական դարեր, հայտնում է BBC News-ը։

Թանգարանի գլխավոր գոհարը դարձել են Թութանհամոն փարավոնի դամբարանից հայտնաբերված առարկաները, որոնք առաջին անգամ են ցուցադրվում 1922 թվականից ի վեր։ Նախկինում այցելուների համար հասանելի էր միայն 5500 առարկայից 1800-ը։ Ցուցադրված են Թութանհամոնի ոսկե դիմակը, գահը և պարտեզային կառքերը։

Մյուս արժեքավոր ցուցանմուշներից է Խուֆուի հուղարկավորական նավը, որն ավելի քան 4500 տարեկան է։ Դա հնագույն ժամանակների ամենահին և լավագույնս պահպանված նավերից մեկն է։ Թանգարանի գլխավոր տեսարժան վայրերից են նաև փարավոն Ռամզես II-ի 3200 տարեկան օբելիսկը և նրա 11 մետրանոց արձանը։

Մեծ եգիպտական թանգարանը աշխարհի ամենամեծ հնագիտական թանգարանն է։ Նրա ստեղծման գաղափարը առաջ է քաշվել 1992 թվականին՝ նախագահ Հոսնի Մուբարաքի իշխանության տարիներին։ Շինարարությունը սկսվել է 2005 թվականին, և, ըստ որոշ գնահատականների, դրա ավարտին ծախսվել է գրեթե նույնքան ժամանակ, որքան Քեոփսի բուրգի կառուցման համար։

Թանգարանի ընդհանուր մակերեսը կազմում է 500 հազար քառակուսի մետր, ինչը համարժեք է մոտ 70 ֆուտբոլային դաշտի։ Համալիրը կազմող ցուցասրահների մեծ մասը բացվել է 2024 թվականին։

Թանգարանը ամբողջությամբ կբացվի այցելուների համար նոյեմբերի 4-ին, և ակնկալվում է, որ այն տարեկան կայցելի մինչև ութ միլիոն մարդ։