07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Գերմանիայի կանցլերը Թուրքիա այցի ժամանակ կքննարկի 22,000 թուրքերի արտաքսման հարցը
Քաղաքականություն
29.10.2025 | 19:33
Գերմանիայի կանցլեր Ֆրիդրիխ Մերցն այս շաբաթ Անկարա այցի ժամանակ կոչ կանի Թուրքիային՝ հետ ընդունել ավելի շատ մարդկանց, որոնց ապաստանի դիմումները մերժվել են, քանի որ Բեռլինը ձգտում է ավելացնել արտաքսումները միգրացիայի շուրջ ներքին ճնշման աճի ֆոնին։ Այս մասին հայտնել է կառավարության աղբյուրը, գրում է Turkiye today-ը։
Աղբյուրը նշել է, որ պաշտոնյաների կողմից վերջին ամիսներին գրանցված «սկզբնական առաջընթացից» հետո «այժմ պետք է ձեռնարկվեն հետագա կոնկրետ քայլեր»։
Մերցը հինգշաբթի Անկարայում պետք է հանդիպի Թուրքիայի նախագահ Ռեջեփ Թայիփ Էրդողանի հետ, ինչը նրա առաջին պաշտոնական այցն է այդ երկիր՝ մայիսին պաշտոնը ստանձնելուց ի վեր։ Գերմանիայի կառավարության փոխխոսնակ Սեբաստիան Հիլեն անցյալ շաբաթ հայտարարել էր, որ քննարկումները կներառեն «երկկողմ և արտաքին քաղաքականության հարցեր, ինչպես նաև տնտեսության, միգրացիայի և անվտանգության ոլորտներում ավելի սերտ համագործակցություն»։
«Մենք ձգտում ենք ԵՄ-Թուրքիա հարաբերություններում հետագա առաջընթացի հասնել և, ինչպես գիտեք, ներկայում բարձր մակարդակի երկխոսություններ ենք վարում առևտրի, միգրացիայի և անվտանգության վերաբերյալ»,- ասել է նա։
Գերմանիայի կառավարության տվյալներով՝ երկրների ղեկավարները կքննարկեն նաև տարածաշրջանային և համաշխարհային հարցեր, այդ թվում՝ Սիրիան և Մերձավոր Արևելքը, ինչպես նաև առևտրի ընդլայնման հնարավորությունները։
Մերցի կառավարությունը խոստացել է պայքարել անկանոն միգրացիայի դեմ՝ շեշտը դնելով արտաքսումների ավելացման վրա։ Գերմանիայի Ներքին գործերի նախարարության տվյալներով՝ 2025 թվականի առաջին ինը ամիսներին արտաքսվել է, ընդհանուր առմամբ, 17,651 մարդ՝ 2024 թվականի նույն ժամանակահատվածի 14,706-ի համեմատ։ Արտաքսվածների ամենամեծ թիվը՝ 1614, Թուրքիայի քաղաքացիներ են։
Միգրացիայի և փախստականների դաշնային գրասենյակը (BAMF) AFP-ին հայտնել է, որ սեպտեմբերի վերջի դրությամբ՝ Գերմանիայից արտաքսման էր սպասում Թուրքիայի 22,560 քաղաքացի։
Բեռլինը նաև ձգտում է վերսկսել Սիրիա արտաքսումները՝ հղում անելով երկրի նոր ղեկավարության օրոք «անվտանգության պայմանների բարելավմանը»։ Գերմանիայի կառավարության խոսնակը հայտարարել է, որ այս հարցը «վերաբերում է նաև Թուրքիայի հետ հարաբերություններին»՝ նշելով Անկարայի սերտ կապերը Դամասկոսի հետ։
Պաշտոնը ստանձնելուց ի վեր Մերցը խստացրել է սահմանային վերահսկողությունը և մտցրել ավելի խիստ բնակության ուև քաղաքացիության կանոններ։ Նրա կառավարությունը նույնիսկ վերսկսել է արտաքսումները թալիբների կողմից կառավարվող Աֆղանստան, ինչը մեծ հակասություններ է առաջացրել։
Թարգմանությունը՝ Էմմա Չոբանյանի
