29.06.2026 | 10:35
Փրկարարները Փամբակ գետում հայտնաբերել են հունիսի 27-ից որոնվող տղամարդու դին
Լիտվան մինչև նոյեմբերի 30-ը փակել է Բելառուսի հետ ցամաքային սահմանը
Քաղաքականություն
29.10.2025 | 18:48
Լիտվայի կառավարությունը որոշել է մինչև նոյեմբերի 30-ը փակել Մյադինինկայի և Շալչինինկայի ցամաքային սահմանային անցակետերը Բելառուսի հետ, գրում է Meduza-ն։
Մյադինինկայի սահմանային անցակետն ունի որոշ բացառություններ. դիվանագետներին, Եվրամիության և ՆԱՏՕ-ի երկրների քաղաքացիներին, Լիտվա վերադարձող քաղաքացիներին և Կալինինգրադից տարանցիկ Լիտվայի բնակության թույլտվություն ունեցողներին թույլատրվելու է հատել սահմանը։ Բացի այդ, Լիտվայի սահմանապահ ծառայությունը կարող է որոշել հումանիտար անցագրեր տրամադրել։
Սահմանի փակումը պայմանավորված է Բելառուսից մաքսանենգ ապրանքներ տեղափոխող օդապարիկների արձակմամբ, որը շարունակվում էր վերջին մի քանի օրերին: Լիտվայի վարչապետ Ինգա Ռուգինիենեն սա անվանել է «հիբրիդային հարձակում»:
«Այս փոփոխությունները պետք է իրական ազդանշան ուղարկեն մեր հարևանին, որը, ինչպես տեսնում ենք այսօր, այնքան էլ բարեկամական չէ և ոչ մի ջանք չի գործադրում խնդիրը լուծելու համար»,- ասել է Լիտվայի ներքին գործերի նախարար Վլադիսլավ Կոնդրատովիչը:
Վերջին շաբաթների ընթացքում Լիտվան չորս անգամ դադարեցրել է Վիլնյուսի օդանավակայանի և մեկ անգամ՝ Կաունասի օդանավակայանի գործունեությունը՝ իր օդային տարածքում օդապարիկների հայտվելու պատճառով։ Լիտվայի իշխանությունները նաև ժամանակավորապես փակել են ցամաքային սահմանային անցակետերը։ Հոկտեմբերի 26-ին Լիտվայի նախագահ Գիտանաս Նաուսեդան առաջարկել էր քննարկել Կալինինգրադի մարզ տարանցիկ փոխադրումների սահմանափակման հարցը։
Բելառուսի նախագահ Ալեքսանդր Լուկաշենկոն Լիտվայի հետ ցամաքային սահմանային անցակետերի ժամանակավոր փակումն անվանել է «խելագար խաբեություն»։
«Նրանք հորինել են անհեթեթ պատրվակ։ Օդապարիկներ։ Նույնիսկ Լիտվայի նման փոքր երկրի համար սա չնչին բան է։ Եթե համոզվենք, որ մեղավոր ենք, մենք ներողություն կխնդրենք»,- ասել է նա։
Թարգմանությունը՝ Էմմա Չոբանյանի
