16.02.2026 | 16:38
Ես ձեր նման քաղաքացի եմ, մեր տանն էլ են ջուրն անջատում․ ՀԾԿՀ նախագահ․ ՏԵՍԱՆՅՈՒԹ
Թուրքիայի ԶՈՒ-ն ստացել է տեղական արտադրության առաջին մարտական տանկերը
Քաղաքականություն
28.10.2025 | 23:01
Թուրքիայի նախագահ Ռեջեփ Թայիփ Էրդողանը մասնակցել է տեղական արտադրության առաջին՝ «Ալթայ» մարտական տանկերը զինված ուժերին մատակարարելու արարողությունը՝ վերահաստատելով երկրի հանձնառությունը պաշտպանական արդյունաբերության ոլորտում լիակատար ինքնաբավության հասնելուն։
««Ալթայ»-ով մենք տանկային տեխնոլոգիաների նոր դարաշրջան ենք բացել։ Մենք վստահ քայլեր ենք ձեռնարկում պաշտպանական արդյունաբերության ոլորտում Թուրքիայի լիակատար անկախության հասնելու ուղղությամբ»,- ասել է Էրդողանը Անկարայում կայացած արարողության ժամանակ։
Նա նաև պաշտոնապես բացել է բարձր տեխնոլոգիական գործարանը, որտեղ կարտադրվեն այս տանկերը և դրանց Batu էներգաբլոկը։
Էրդողանը նշել է, որ ամսական կարտադրվի ութ Altay տանկ։ Առայժմ թուրքական բանակի սպառազինության մեջ կմտնի երեք տանկ։ Նախագծի շրջանակում, ընդհանուր առմամբ, կմատակարարվի 250 տանկ․ 85-ը՝ T1 կոնֆիգուրացիայով և 165-ը՝ T2 կոնֆիգուրացիայով։ Թուրքիայի նախագահի խոսքով՝ գործարանն ամսական կարտադրի նաև 10 նոր սերնդի «Ալթայ» 8×8 զրահապատ մարտական մեքենա։
«Ալթայ» նախագիծը սկզբնավորումից ի վեր բախվել էր խոչընդոտների և ուշացումների, հիմնականում՝ արտահանման լիցենզիաների սահմանափակումների պատճառով։
«Մեր ժամանակակից օդային, ցամաքային և ծովային տրանսպորտային հնարավորությունների շնորհիվ մենք շարունակում ենք նոր գլուխ գրել պատմության մեջ։ Մենք այլևս այն ազգը չենք, որը հետևում է ուրիշներին։ Մենք այժմ այն ազգն ենք, որին հետևում են»,- ասել է Էրդողանը։
Նա նաև նշել է, որ Թուրքիան այժմ աշխարհում 11-րդ խոշորագույն պաշտպանական արտահանողն է։
«2024 թվականին մենք ապահովեցինք անօդաչու թռչող սարքերի համաշխարհային արտահանման շուկայի 65%-ը, ինչը նշանակում է, որ աշխարհում վաճառված յուրաքանչյուր 100 անօդաչու թռչող սարքերից 65-ը մատակարարվել են մեր կողմից»,- նշել է նա։
Թարգմանությունը՝ Էմմա Չոբանյանի
