28.04.2026 | 23:24
Երևանում երթևեկության փոփոխություն կկատարվի
Թուրքիայում 6,1 մագնիտուդով երկրաշարժ է տեղի ունեցել․ տուժել է 22 մարդ․ ՏԵՍԱՆՅՈՒԹ
Քաղաքականություն
28.10.2025 | 11:30
Թուրքիայի հյուսիսարևմտյան Բալըքեսիր նահանգի Սընդըրգի շրջանում երեկ երեկոյան ժամը 22:49-ի սահմաններում 6,1 մագնիտուդով երկրաշարժ է տեղի ունեցել, հայտնում է Թուրքիայի Աղետների և արտակարգ իրավիճակների կառավարման վարչությունը (AFAD)։
Ըստ Bianet-ի՝ էԷպիկենտրոնից ստացված լուսանկարները ցույց են տվել, որ Սընդըրգիում որոշ շենքեր փլուզվել են: Բալըքեսիրի նահանգապետ Իսմայիլ Ուստաօղլուն հայտարարել է, որ փլուզված շենքերի բնակիչները տարհանվել են՝ դրանց անկայունության պատճառով:
Երկրաշարժը զգացվել է ոչ միայն Բալըքեսիրի մոտակա Իզմիր և Բուրսա նահանգներում, այլև ավելի քան 200 կիլոմետր հյուսիս՝ Ստամբուլում և Թեքիրդաղում, Մարմարա ծովի մյուս կողմում։ AFAD-ի տվյալներով՝ երկրաշարժը տեղի է ունեցել 5,99 կիլոմետր խորության վրա։
Երկրաշարժն աշխատանքի կարճատև խափանումներ է առաջացրել Ստամբուլի երկու օդանավակայաններում։ Օդաչուներին հանձնարարվել է կատարել շրջանցիկ թռիչքներ և օդում մնալ։ Սաբիհա Գյոքչեն օդանավակայանում խափանումը տևել է շուրջ հինգ րոպե։
Տրանսպորտի և ենթակառուցվածքների նախարար Աբդուլքադիր Ուրալօղլուն հաստատել է, որ Բալիքեսիրում կապի ենթակառուցվածքները չեն վնասվել։
Երկրաշարժի հետևանքով զոհեր չկան, սակայն փլուզվել են երեք չօգտագործվող շենքեր և մեկ խանութ: 22 մարդ վնասվածքներ է ստացել։
Բալըքեսիրի նահանգապետարանը սոցիալական ցանցերում հայտնել է, որ երկրաշարժի պատճառով նահանգում գործող բոլոր դպրոցները հոկտեմբերի 28-ին փակ կլինեն։ Հանրային հաստատություններում և կազմակերպություններում աշխատող հղի և հաշմանդամություն ունեցող անձինք կգտնվեն վարչական արձակուրդում։
Թարգմանությունը՝ Էմմա Չոբանյանի
