16.02.2026 | 23:24
Այրվել են պահեստային բաքերը և բեռնատար մեքենա. մանրամասներ Թալինի գազալցակայաններից մեկում բռնկված հրդեհից
Ֆրանսիայի ևս մեկ թանգարան է կողոպտվել
Քաղաքականություն
22.10.2025 | 17:03
Ֆրանսիայի Լանգրե քաղաքի հյուսիսարևմտյան մասում գտնվող «Դենի Դիդրոյի լուսավորության տուն» թանգարանը թալանել են։ Հոկտեմբերի 20-ի առավոտյան թանգարանի աշխատակիցները, աշխատանքի ժամանելով, հայտնաբերել են, որ մուտքի դուռը կոտրված է, իսկ ոսկե և արծաթե մետաղադրամներով լի ապակե ցուցափեղկը կոտրվել է, գրում է Meduza-ն։
Հանցագործները գողացել են թանգարանում ցուցադրված մետաղադրամներից մի քանիսը։ Խոսքը մետաղադրամների հավաքածուի մասին է (1633 արծաթե և 319 ոսկե), որոնք հատվել են 1790-1840 թվականներին և հայտնաբերվել 2011 թվականին թանգարանի շենքի վերականգնման ժամանակ։
Թանգարանի մյուս ցուցանմուշները մնացել են տեղում։
Քաղաքապետարանը հայտարարել է, որ իրավապահ մարմիններն անմիջապես տեղեկացվել են միջադեպի մասին։ Թանգարանի աշխատակիցներն այժմ գնահատում են գողացված մետաղադրամների ճշգրիտ թիվը։
Հավելենք, որ այս թանգարանի կողոպուտը տեղի է ունեցել Փարիզում Լուվրի կողոպուտից մեկ օր անց։ Դիմակավորված հանցագործները կայսերական հավաքածուից գողացել էին ինը ցուցանմուշ, այդ թվում՝ Նապոլեոնին և նրա կնոջը՝ Ժոզեֆինային պատկանող զարդեր։ Գողացված իրերի ընդհանուր արժեքը կազմում է 88 միլիոն եվրո։
Թարգմանությունը՝ Էմմա Չոբանյանի
