Լեհաստանի ԱԳ նախարարը չի բացառել, որ Պուտինը կարող է ձերբակալվել, եթե նրա ինքնաթիռը Բուդապեշտի  ճանապարհին թռչի երկրի օդային տարածքով

Լեհաստանի արտաքին գործերի նախարար Ռադոսլավ Սիկորսկին հայտարարել է, որ եթե ՌԴ նախագահ Վլադիմիր Պուտինը թռչի Լեհաստանի օդային տարածքով՝ ԱՄՆ նախագահ Դոնալդ Թրամփի հետ հնարավոր հանդիպման համար, նրա օդանավը կարող է հարկադիր վայրէջք կատարել՝  ձերբակալելու համար՝ Հաագայի Միջազգային քրեական դատարանի կողմից տրված որոշման համաձայն, գրում է BBC-ի ռուսական ծառայությունը։

«Մենք չենք կարող երաշխավորել, որ լեհական անկախ դատարանը հիպոթետիկ չի հրամայի կառավարությանը իջեցնել  օդանավը՝ կասկածյալին Հաագայում դատարանին հանձնելու համար»,- ասել է Սիկորսկին Radio Rodzina-ի հետ զրույցում։

Վերջերս տեղի ունեցած հեռախոսազրույցի ժամանակ Թրամփը և Պուտինը պայմանավորվել են հանդիպել Հունգարիայի մայրաքաղաք Բուդապեշտում, հանդիպման օրը դեռևս որոշված ​​չէ։

Հունգարիայի բոլոր հարևան երկրները՝ բացի Սերբիայից, դադարեցրել են Ռուսաստանի հետ կանոնավոր օդային հաղորդակցությունը, բայց կարող են քննարկել Ռուսաստանի նախագահի օդանավին իրենց օդային տարածքով անցնելու թույլտվություն տալու հարցը։ Լեհաստանը սահման չունի Հունգարիայի հետ։

Պուտինը ձերբակալման է ենթակա Միջազգային քրեական դատարանի կողմից 2023 թվականի մարտին տրված օրդերի համաձայն այն երկրներում, որոնք ստորագրել են դատարանի կանոնադրությունը։

Սիկորսկին խոստովանել է, որ Պուտինը տեսականորեն կարող է խուսափել ԵՄ տարածքից մինչև Հունգարիա հասնելը (որը հայտարարել էր ՄՔԴ-ից դուրս գալու մասին, չնայած այս որոշումը դեռևս ուժի մեջ չի մտել)՝ թռչելով Թուրքիայի, ծովի, Չեռնոգորիայի և Սերբիայի վրայով։ Ի դեպ, Սերբիան և Չեռնոգորիան նույնպես ՄՔԴ անդամներ են։

Հիշեցնենք, որ ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը «ոչ հաճելի» էր անվանել այն փաստը, որ Ռուսաստանի նախագահ Վլադիմիր Պուտինը կարող է ժամանել Հունգարիա՝ Ուկրաինայում պատերազմը քննարկելու համար:ԵՄ անդամ երկրների մի շարք ԱԳ նախարարներ նույնպես բացասական կարծիք էին հայտնել Պուտինի՝ Թրամփի հետ հանդիպելու և Հունգարիա այցելելու հեռանկարի վերաբերյալ:

Թարգմանությունը՝ Էմմա Չոբանյանի