Հասարակություն
20.10.2025 | 11:51Բեռնատարների վարորդները այսօր կրկին բողոքի ակցիա են իրականացնում կառավարության շենքի առջև: Նրանք պահանջում են, որ կառավարությունը ռուսական կողմի հետ բանակցի այնտեղ գտնվելու 90-օրվա արգելքը հանելու վերաբերյալ:
Վարորդներից մեկը հայտարարեց, եթե կառավարությունը չընդառաջի իրենց և իրենց խնդրին լուծում չտվեցին ստիպված են լինելու բեռնատարներով փակել մայրաքաղաքի փողոցները։
«ՌԴ-ին ինձ արդեն դեպորտ են արել, ես հիմա չեմ կարող գնալ։ Ստեղ մնամ պահակություն պետք է անեմ։ Խնդրի առաջ եմ կանգնել, բա որ չաշխատեմ իմ ընատանիքն ո՞վ է պահելու։ Մենք չենք աշխատում, ինչի՞ են ռուսները գալիս էստեղ բեռնափոխադրումներ իրականացնում»,- դժգոհեց նա։
Նշենք, որ բողոքի ակցիա իրականացնող վարորդները պատրաստվում են նամակ փոխանցել փոխվարչապետ Մհեր Գրիգորյանին։
Հիշեցնենք, որ այս տարվա հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով, օրացույցային տարվա ընթացքում կարող են մնալ 90 օր նախկին 180 օրվա փոխարեն։
Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։ Կառավարության շենքի դիմաց հավաքված վարորդները պնդում են, որ 90 օրը քիչ է, որովհետև թույլատրելի ժամկետի մեծ մասն իրենք կարող են անցկացնել, օրինակ, Վլադիկավկազում կամ Վերին Լարսում հերթերի մեջ։ Բողոքի ակցիա իրականացնող վարորդները պահանջում են, որպեսզի ՌԴ նոր միգրացիոն փոփոխությունը Հայաստանին չվերաբերի։
Նշենք, որ նախորդ շաբաթ վարորդները ևս բողոքի ակցիա են իրականացրել կառավարության շենքի դիմաց։ Էկոնոմիկայի նախարար Գևորգ Պապոյանը զրուցել էր նրանց հետ և ասել, որ զբաղվում են այս խնդրով: Նախարարը, սակայն, ժամկետներ չէր նշել, թե երբ կարող է խնդիրը լուծվել։ Նախորդ շաբաթ բեռնափոխադրումներ իրականացնող վարորդները նաև նամակ- դիմում էին փոխանցել կառավարություն, սակայն, մինչև այս նրանց գործադիրից չեն պատասխանել։
Մանրամասները՝ տեսանյութում։
Մանյա Պողոսյան
