Հասարակություն
20.10.2025 | 11:27Բեռնատարների վարորդները այսօր կրկին բողոքի ակցիա են իրականացնում կառավարության շենքի առջև: Նրանք պահանջում են, որ կառավարությունը ռուսական կողմի հետ բանակցի այնտեղ գտնվելու 90-օրվա սահմանափակումը հանելու վերաբերյալ:
Խնդիրը լուծելու պահանջով արդեն երրորդ անգամ դեպի Ռուսաստանի Դաշնություն բեռափոխադրումներ իրականացնող վարորդները բողոքի ցույց են անում։ Ակցիայի մասնակիցներից մեկը լրագրողների հետ զրույցում հայտարարեց՝ եթե խնդիրը չկարգավորվեց, տնտեսական լուրջ խնդիրներ են առաջանալու։
«Եթե խնդիրը չլուծվեց, հունվարին ավելի է վիճակը սրվելու, շրջափակման մեջ ենք հայտնվելու։ Գիտեք նաև, թե ինչ վիճակ է Վրաստանում հայ բեռնափոխադրողների համար։ Եթե գյուղացին լոլիկ ու վարունգ աճեցրեց, բայց վարորդը չկարողացավ արտահանել, ամբողջ տնտեսությունը կարող է կաթվածահար լինել, օրհասական վիճակ է»,- ասաց նա՝ հավելելով, որ այս ակցիան քաղաքական նպատակ չունի, «սևերի-սպիտակների» հարց չկա։
Նշենք, որ բողոքի ակցիա իրականացնող վարորդները պատրաստվում են նամակ փոխանցել փոխվարչապետ Մհեր Գրիգորյանին։
Հիշեցնենք, որ այս տարվա հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով, օրացույցային տարվա ընթացքում կարող են մնալ 90 օր նախկին 180 օրվա փոխարեն։ Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։ Կառավարության շենքի դիմաց հավաքված վարորդները պնդում են, որ 90 օրը քիչ է, որովհետև թույլատրելի ժամկետի մեծ մասն իրենք կարող են անցկացնել, օրինակ, Վլադիկավկազում կամ Վերին Լարսում հերթերի մեջ։ Բողոքի ակցիա իրականացնող վարորդները պահանջում են, որպեսզի ՌԴ նոր միգրացիոն փոփոխությունը Հայաստանին չվերաբերի։
Նշենք, որ նախորդ շաբաթ վարորդները ևս բողոքի ակցիա են իրականացրել կառավարության շենքի դիմաց։ Էկոնոմիկայի նախարար Գևորգ Պապոյանը զրուցել էր նրանց հետ և ասել, որ զբաղվում են այս խնդրով: Նախարարը, սակայն, ժամկետներ չէր նշել, թե երբ կարող է խնդիրը լուծվել։ Նախորդ շաբաթ բեռնափոխադրումներ իրականացնող վարորդները նաև նամակ- դիմում էին փոխանցել կառավարություն, սակայն, մինչև այս նրանց գործադիրից չեն պատասխանել։
Մանրամասները՝ տեսանյութում։
Մանյա Պողոսյան
