03.09.2026 | 22:51
Կենտրոնում փոշու պարունակությունը գերազանցել է թույլատրելի կոնցենտրացիան գրեթե ամբողջ շաբաթ
Թրամփը հայտարարել է Կոլումբիայի ֆինանսավորումը դադարեցնելու մասին և երկրի նախագահին անվանել «գլխավոր թմրավաճառ»
Քաղաքականություն
19.10.2025 | 19:19
ԱՄՆ նախագահ Դոնալդ Թրամփը հայտարարել է, որ Կոլումբիային տրամադրվող բոլոր ամերիկյան վճարումները և սուբսիդիաները դադարեցվում են, քանի որ երկրի իշխանություններն ի վիճակի չեն պայքարելու թմրանյութերի արտադրության աճի դեմ, որոնք մաքսանենգ ճանապարհով հասնում են ԱՄՆ։ Այդ մասին Թրամփը գրել է իր TruthSocial սոցիալական հարթակում՝ կիրակի, հոկտեմբերի 19-ին։
«Կոլումբիայի նախագահ Գուստավո Պետրոն, երկրի գլխավոր թմրավաճառը, ակտիվորեն խրախուսում է թմրանյութերի մեծածավալ արտադրությունը՝ ինչպես մեծ, այնպես էլ փոքր պլանտացիաներում։ Դա, անկասկած, դարձել է Կոլումբիայի խոշորագույն բիզնեսը, և Պետրոն ոչինչ չի անում այն կանգնեցնելու համար, չնայած ԱՄՆ-ի կողմից տրամադրվող խոշոր վճարումներին ու սուբսիդիաներին, որոնք նմանվում են Ամերիկայի երկարաժամկետ թալանի»,-գրել է Թրամփը։
Նրա խոսքով՝ այդ բոլոր վճարումները և սուբսիդիաները ցանկացած ձևաչափով դադարեցվում են «սկսած այսօրվանից»։ ԱՄՆ նախագահը հայտարարել է, որ Կոլումբիայում թմրանյութերի արտադրության նպատակը դրանց մատակարարումն է ԱՄՆ։
Նախօրեին Թրամփը հայտնել էր, որ ամերիկյան զինվորականները ոչնչացրել են սուզանավ, որը տեղափոխում էր ֆենտանիլի և այլ թմրանյութերի խոշոր խմբաքանակ՝ «լավ հայտնի երթուղով»։ Նախագահը հրապարակել էր նաև հարվածի տեսանյութը։
Նրա խոսքով՝ խցիկում գտնվող չորս անձանցից երկուսը զոհվել են, իսկ երկու ուրիշներ՝ Կոլումբիայի և Էկվադորի քաղաքացիներ, արտահանձնվել են իրենց երկրներ՝ ձերբակալման և դատական գործընթացի համար։ Կոլումբիայի և Էկվադորի իշխանությունները հաստատել են, որ ողջ մնացածները վերադարձվել են հայրենիք։
