Պուտինը Կրեմլում ընդունել է Սիրիայի նախագահին․ վերջինը ցանկանում է Ասադի արտահանձնումը․ ՏԵՍԱՆՅՈՒԹ

Սիրիայի անցումային շրջանի նախագահ Ահմեդ ալ-Շարաան իշխանության գալուց հետո առաջին անգամ այցելել է Մոսկվա, որին Կրեմլում ընդունել է ՌԴ նախագահ Վլադիմիր Պուտինը, գրում է Meduza-ն։

«Մեր երկրները տասնամյակների ընթացքում զարգացրել են հատուկ հարաբերություններ»,- հանդիպման ժամանակ ասել է Պուտինը՝ նշելով, որ Ռուսաստանը երբեք չի ունեցել «քաղաքական հանգամանքների կամ հատուկ շահերի հետ կապված որևէ հարաբերություն»։

Ռուսաստանի նախագահի խոսքով՝ Սիրիան ներկայում «դժվար ժամանակներ է ապրում», սակայն վերջին խորհրդարանական ընտրությունները կամրապնդեն «բոլոր քաղաքական ուժերի միջև համագործակցությունը»։

Ի պատասխան՝ Ահմեդ ալ-Շարաան հայտարարել է, որ Ռուսաստանը «կարևոր դեր կունենա նոր Սիրիայի զարգացման գործում»։

Reuters-ի աղբյուրներն ավելի վաղ հայտնել էին, որ Սիրիայի նախագահը մտադիր է հանդիպման ժամանակ պահանջել Մոսկվայում թաքնվող Սիրիայի նախկին առաջնորդ Բաշար ալ-Ասադի արտահանձնումը: Բացի այդ, Ահմեդ ալ-Շարաան նախատեսում է բանակցություններ վարել Տարտուսում ռուսական ռազմածովային բազայի և Խմեյմիմի ավիաբազայի պահպանման վերաբերյալ, հայտնել է սիրիական պաշտոնական աղբյուրը:

Ռուսաստանի և Սիրիայի ղեկավարների միջև բանակցությունները կանցկացվեն փակ դռների հետևում: ՌԴ արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվան և Դամասկոսը, ի թիվս այլ հարցերի, քննարկում են «Ռուսաստանի ռազմական ներկայության հարցը» Սիրիայում, այդ թվում՝ «ռուսական ռազմական օբյեկտների ֆունկցիոնալության հնարավոր վերակառուցման համատեքստում»:

Կրեմլի մամուլի ծառայությունը հայտնել էր, որ ՌԴ նախագահ Վլադիմիր Պուտինը և Սիրիայի նախագահ Ահմեդ ալ-Շարաան կքննարկեն Ռուսաստանի և Սիրիայի միջև առևտրային, հումանիտար և քաղաքական կապերը։

Ասադի ռեժիմը, որը երկար տարիներ զբաղեցրել էր Սիրիայի նախագահի պաշտոնը, տապալվել էր դեկտեմբերի 8-ին, երբ զինված ընդդիմադիր խմբավորումները մտել էին Դամասկոս։

Այս խմբավորումներից մեկի առաջնորդ Ահմեդ ալ-Շարաան ստանձնել էր իշխանությունը և այժմ ծառայում է որպես երկրի անցումային նախագահ։ Ասադը փախել է Ռուսաստան և ապաստան գտել Մոսկվայում, որտեղ, որոշ տեղեկությունների համաձայն, գտնվում են նաև նրա կինն ու երեխաները։ Սիրիայի նախկին նախագահին մոտ կանգնած աղբյուրը, որն այդ տեղեկատվությունն անուղղակիորեն ստացել է որոշակի «հուսալի աղբյուրներից», հայտնել է, որ Ասադն ապրում է Մոսկվա քաղաքում և «ժամանակն անցկացնում է առցանց խաղեր խաղալով»։

Թարգմանությունը՝ Էմմա Չոբանյանի