09.06.2026 | 12:43
Թրամփը հայտարարել է, որ Իրանի հետ գործարքը կարող է կնքվել «երկու կամ երեք օրից»
ՌԴ-ն հարձակվել է Ուկրաինայի վրա 50 հրթիռով և 500 դրոնով․ Զելենսկի
Քաղաքականություն
05.10.2025 | 13:56
Ուկրաինայի նախագահ Վլադիմիր Զելենսկու խոսքով՝ հոկտեմբերի 5-ի գիշերը Ռուսաստանը զանգվածային հարձակման է ենթարկել Ուկրաինայի մի շարք շրջաններ, այդ թվում՝ արևմտյան մարզեր։ Զելենսկին հայտնել է, որ ռուսները կիրառել են մոտ 500 հարվածային անօդաչու թռչող սարք (դրոն) և ավելի քան 50 հրթիռ, այդ թվում՝ «Կինժալ» տիպի։
Զելենսկու տեղեկացմամբ, հարվածների թիրախում են եղել Ուկրաինայի ինը մարզեր՝ Լվովի, Իվանո-Ֆրանկովսկի, Զապորոժիեի, Չեռնիգովի, Սումիի, Խարկովի, Խերսոնի, Օդեսայի և Կիրովոգրադի։ Հարձակման հետևանքով զոհվել է հինգ քաղաքացի, վիրավորվել՝ շուրջ տասը։
«Ռուսները կրկին հարվածել են մեր ենթակառուցվածքներին՝ ամենին, ինչը կապ ունի մարդկանց բնականոն կյանքի հետ։ Անհրաժեշտ է ավելի հզոր պաշտպանություն, հատկապես՝ հակաօդային պաշտպանության ոլորտում։ Միակողմանի հրադադարի հաստատումը օդում հնարավոր է, և դա կարող է ճանապարհ բացել իսկական դիվանագիտության համար»,-գրել է Զելենսկին սոցցանցերում։
Ուկրաինայի արտակարգ իրավիճակների պետական ծառայության (ԳՇԾ) տվյալներով՝ Լվովի մարզում ռուսական հարվածների հետևանքով զոհվել է չորս քաղաքացի, վիրավորվել՝ ևս չորսը։
«Ռուսները ավելի քան հինգ ժամ շարունակ ահաբեկել են մարզը համակցված հարվածներով։ Վնասվել են մի շարք օբյեկտներ, այդ թվում՝ բնակելի տներ։ Տուժած վայրերում աշխատում են փրկարարներ, բժիշկներ, ոստիկաններ, ինչպես նաև հոգեբաններ»,-հայտնել է ծառայությունը։
Լվովի ռազմական վարչակազմի ղեկավար Մաքսիմ Կոզիցկին գրել է, որ Լապաևկա գյուղում հարված է հասցվել բնակելի թաղամասին, ինչի հետևանքով մի տուն ամբողջությամբ ավերվել է, վնասվել՝ ևս ութը։ Վիրավորների ընդհանուր թիվը մարզում հասել է վեցի։
Լվովի քաղաքապետ Անդրեյ Սադովին հայտնել է, որ ռուսական հարձակման պատճառով քաղաքի մի մասը մնացել է առանց հոսանքի։
«Հակառակորդի զանգվածային հարձակման պատճառով Լվովում հասարակական տրանսպորտը ժամանակավորապես չի գործում։ Խնդրում եմ բնակիչներին մնալ ապահով վայրերում, այժմ փողոց դուրս գալը վտանգավոր է»,- հայտարարել է նա հոկտեմբերի 5-ի առավոտյան։ Ավելի ուշ Սադովին հայտնել է, որ քաղաքային տրանսպորտը վերագործարկվել է։
Նա նաև տեղեկացրել է, որ ռուսները հարվածել են Sparrow արդյունաբերական պարկին, ինչի հետևանքով այնտեղ հրդեհ է բռնկվել։ Շեշտվել է, որ այդ տարածքում ոչ մի ռազմական օբյեկտ չի եղել։
Ուկրաինական Insider UA Telegram-ալիքի տվյալներով՝ արդյունաբերական պարկում այրվել են պահեստներ, որտեղ պահվել են նաև լեհական LPP ընկերության հագուստներ և ծխախոտային արտադրանք։
Հարվածի ընթացքում Լվովի մարզի հարևանությամբ տեղակայված Լեհաստանը օդ բարձրացրել է կործանիչներ։
