19.05.2026 | 10:11
Արտարժույթների փոխարժեքները՝ մայիսի 19-ի դրությամբ
Բելգիայում ռազմաբազայի վերևում 15 ԱԹՍ է նկատվել
Քաղաքականություն
03.10.2025 | 16:30
15 անօդաչու թռչող սարք է նկատվել Բելգիայի Լիեժ նահանգի Էլսենբորն քաղաքում գտնվող ռազմաբազայի վերևում։ Բելգիայի պաշտպանության նախարար Թեո Ֆրանկենի գրասենյակը հաստատել է տեղեկությունը, գրում է VRT News-ը։
Մասնավորապես, հաղորդվում է, որ ուրբաթ ժամը 1:45-ի սահմաններում 15 անօդաչու թռչող սարք է նկատվել Էլսենեբորն ռազմական բազայի վերևում թռչելիս, որը գտնվում է Գերմանիայի սահմանից մի քանի կիլոմետր հեռավորության վրա: Բազան զբաղեցնում է 28 կմ² տարածք: Այն բանակային վարժական ճամբար է, որն ունի անվտանգ տարածք, որտեղ անցկացվում են կրակային վարժանքներ:
VRT News-ի ռազմական խմբագիր Յենս Ֆրանսենը նշել է, որ «պատահական կերպով բազայում փորձարկվել է անօդաչու թռչող սարքերի հայտնաբերման համակարգ, որը կարողացել է հայտնաբերել անօդաչու սարքերը»։ Ենթադրվում է, որ անօդաչու սարքերը Բելգիայից թռել են դեպի Գերմանիա։ Գերմանական Դյուրեն փոքրիկ քաղաքի ոստիկանությունը նույնպես տեսել է դրանք։
Անօդաչու սարքերի ծագումը և դրանց շահագործողը դեռևս անհայտ են։ Զինվորականները հետաքննում են միջադեպը։
Վերջին շաբաթների ընթացքում մի շարք եվրոպական երկրներ հայտնել են իրենց օդային տարածքում անհայտ անօդաչու թռչող սարքերի մասին: Մասնավորապես, Նորվեգիայի և Դանիայի օդանավակայանները բազմիցս դադարեցրել են իրենց գործունեությունը անօդաչու թռչող սարքերի մասին հաղորդագրությունների պատճառով: Der Spiegel-ը հայտնել էր, որ սեպտեմբերի վերջին անհայտ անօդաչու թռչող սարքեր են նկատվել Գերմանիայի հյուսիսային Շլեզվիգ-Հոլշտեյն նահանգում: Դրանք, ենթադրաբար, դիտարկել են կարևորագույն ենթակառուցվածքները:
Ավելի վաղ հաղորդվել էր, որ Մյունխենի օդանավակայանում չվերթներ են չեղարկվել ԱԹՍ-ի պատճառով։
Թարգմանությունը՝ Էմմա Չոբանյանի
