Խափանվող «ԳԱԶԵԼ»-ներ՝ հատուկ դպրոցի երեխաների համար․ ծնողների ահազանգի հետքերով․ ՏԵՍԱՆՅՈՒԹ

Երևանի թիվ 17 հատուկ դպրոցի ծնողխորհրդի նախագահ Մարիամ Պողոսյանն ահազանգում է․ դպրոցն ունի հաշմանդամություն ունեցող երեխաների համար հարմարեցված ընդամենը երկու «Գազել», որոնք մաշված են և չեն ապահովում երեխաների անվտանգ տեղափոխությունը։

«Մեքենաները բավական հին են, հաճախ են փչանում, լինում են դեպքեր, երբ շաբաթներով վերանորոգվում են և երեխաները զրկվում են կրթության իրավունքից, խախտվում են նրանց հավասար կրթություն ստանալու իրավունքները»,- ասում է  Երևանի թիվ 17 հատուկ դպրոցի ծնողխորհրդի նախագահ Մարիամ Պողոսյանը։

Ըստ Պողոսյանի՝ քաղաքապետարանը պատրաստվում է ժամանակավոր ավտոբուս տրամադրել, սակայն այն ոչ հարմարեցված է հաշմանդամություն ունեցող երեխաներին, ոչ էլ նոր է: Ակնկալում է, որ քաղաքային իշխանությունը  տրանսպորտի արդիականացմամբ ավելի հիմնավոր կզբաղվի։

Մարիամի երեխան սովորում է 9-րդ դասարանում և արդեն երկու տարի հաճախում է թիվ 17 հատուկ դպրոց։ Պատմում է, որ պարբերաբար դիմումներ ու նամակներ է ուղարկել պատկան մարմիններին։ Խնդրի մասին տեղյակ է նաև Երևանի քաղաքապետ Տիգրան Ավինյանը։

Երևանի քաղաքապետարանից փոխանցեցին՝ տրանսպորտային միջոցի հատկացումը բարի կամքի դրսևորում է, հիշեցրին՝ դպրոցը ԿԳՄՍ նախարարության ենթակայության տակ է։

«Հաշվի առնելով, որ Երևանի բնակիչներ են, ի վերջո, երեխաներ են օգտվում հենաշարժողական խնդիրներ ունեցող երեխաներ են օգտվում, մենք այս լուծումն են այս պահին գտել»,- ասաց Երևանի քաղաքապետարանի աշխատակազմի հանրակրթության վարչության պետ Մարգարիտ Խաչատրյանը:

Պաշտոնյայի խոսքով` այլ լուծումների շուրջ այս պահին ևս մտածում են․ բայց արդյո՞ք հնարավոր չէ տրանսպորտային միոջոցը կահավորել, հետո տրամադրել դպրոցին՝ հարցրինք Խաչատրյանին։

«Դա հավելյալ տեխնիկական և փաստաթղթային դժվարություններ  է առաջացնում, նորից եմ ասում բոլորը չէ, որ օգտվում են սայլակից, վստահաբար, օգտակար է լինելու այլ երեխաների»,- ընդգծեց վարչության պետը:

Թե ավտոբուսը երբ կտրամադրվի՝ պաշտոնյան հստակ ժամկետ չնշեց, միայն ասաց՝ օրերս, իսկ ԿԳՄՍ նախարարությունից մեր հարցերին ի պատասխան միայն հայտնեցին՝ դպրոցն ապահովում է աշակերտների տեղափոխումը։

«Մնացած դեպքերում տեղափոխումն ապահավում են ծնողները կամ, անհրաժեշտության դեպքում, քաղաքապետարանը կարող է լրացուցիչ օգնություն  ցուցաբերել`  որպես պատասխանատու համայնք։ Միևնույն ժամանակ, նախարարությունը պատրաստ է քննարկել տրանսպորտային միջոցը սովորողների հատուկ կարիքներին համապատասխանեցնելու հնարավորությունը»։

Թեմային անդրադարձ է եղել նաև ավագանու վերջին նիստում․ Ավինյանը հայտարարեց, որ երեխաների տեղափոխության համար կտրամադրեն տրանսպորտային միջոց։

Թիվ 17 հատուկ դպրոցի տնօրենն ասաց, որ մեկնաբանություն չեն ուզում տալ՝ վկայակոչելով Երևանի քաղաքապետարանի հետ ձեռքբերված բանավոր պայմանավորվածությունը։

Մանրամասները` տեսանյութում:

Արփի Հակոբյան