23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
ԵՄ-ն Կիևին 2 միլիարդ եվրո կհատկացնի ԱԹՍ-ների արտադրության համար․ ֆոն դեր Լեյեն
Քաղաքականություն
30.09.2025 | 15:08
Ուկրաինային տրամադրվող փոխհատուցման վարկի մի մասը, որը երաշխավորվում է սառեցված ռուսական ակտիվներով, կօգտագործվի Եվրոպայում պաշտպանական գնումների համար։ Այս մասին հայտարարել է Եվրահանձնաժողովի նախագահ Ուրսուլա ֆոն դեր Լեյենը, փոխանցում է BBC-ի ռուսական ծառայությունը։
«Մեզ անհրաժեշտ է ավելի կառուցվածքային լուծում [Ուկրաինային] ռազմական աջակցության համար։ Ահա թե ինչու ես առաջ եմ քաշել սառեցված ռուսական ակտիվների վրա հիմնված փոխհատուցման վարկի գաղափարը»,- ասել է Եվրահանձնաժողովի ղեկավարը։
Նա բացատրել է, որ վարկը չի տրամադրվի միանվագ, այլ տրանշերով և որոշակի պայմաններով։
«Մենք կամրապնդենք մեր պաշտպանական արդյունաբերությունը՝ ապահովելով, որ վարկի մի մասն օգտագործվի Եվրոպայում ռազմական գնումների համար և եվրոպական մասնակցությամբ»,- ասել է ֆոն դեր Լեյենը։
Նրա խոսքով՝ ռուսական ակտիվների առգրավում չի նախատեսվում. Ուկրաինան պետք է վերադարձնի վարկը, եթե Ռուսաստանը վճարի փոխհատուցում։
Բրյուսելում Եվրոպական հանձնաժողովի Անվտանգության խորհրդի նիստի մեկնարկից առաջ նա նաև հայտարարել է, որ Եվրահանձնաժողովը համաձայնության է եկել Ուկրաինայի հետ՝ ԱԹՍ-ների արտադրության համար 2 միլիարդ եվրո հատկացնելու վերաբերյալ։
«Եթե մենք շարունակենք հավատալ, որ Ուկրաինան մեր պաշտպանության առաջին գիծն է, մենք պետք է մեծացնենք Ուկրաինային տրամադրվող ռազմական օգնությունը։ Հետևաբար, մենք կոնկրետ համաձայնության ենք եկել Ուկրաինայի հետ, որ առայժմ անօդաչու թռչող սարքերի վրա կծախսվի ընդամենը 2 միլիարդ եվրո»,- նշել է ֆոն դեր Լեյենը։
Ֆինանսավորումը պետք է օգնի Ուկրաինային ամրապնդել սեփական պաշտպանական կարողությունները՝ միաժամանակ զարգացնելով Եվրամիության համար օգտակար բարձր տեխնոլոգիաներ։ Դա թույլ կտա Ուկրաինային ընդլայնվել և օգտագործել իր ողջ ներուժը։ Եվ, իհարկե, դա նաև թույլ կտա ԵՄ-ին օգուտ ստանալ այդ տեխնոլոգիայից, հայտարարել է Եվրահանձնաժողովի նախագահը։
Թարգմանությունը՝ Էմմա Չոբանյանի
