16.07.2026 | 12:26
Ժաննա Անդրեասյանը ծանոթացել է Ծիծեռնակաբերդի բարեկարգման երկրորդ փուլի աշխատանքներին
Նիդերլանդներում երկու դեռահաս է ձերբակալվել ՌԴ-ի օգտին լրտեսելու կասկածանքով․ նրանց հավաքագրել են Telegram-ի միջոցով
Քաղաքականություն
26.09.2025 | 19:21
Նիդերլանդներում երկու 17-ամյա դեռահաս է ձերբակալվել Ռուսաստանի օգտին լրտեսելու կասկածանքով, հաղորդում է De Telegraaf-ը, գրում է The Insider-ը:
Հինգշաբթի նրանցից մեկի նախնական կալանքը երկարաձգվել է երկու շաբաթով, իսկ մյուսի նկատմամբ կիրառվել է տնային կալանք: Տղաներից մեկի հայրը լրագրողներին ասել է, որ ԱՄՆ Արդարադատության նախարարությունը կասկածում է նրան օգոստոսի 16-ին Եվրոպոլի, Եվրոջասթի և Հաագայում Կանադայի դեսպանատան գրասենյակների կողքով անցնելու մեջ: Այդ ժամանակ տղան, ենթադրաբար, իր հետ ունեցել է «Wi-Fi որոնիչ»՝ սարք, որը որսում և վերլուծում է երթևեկությունը:
Տղամարդը նաև հայտնել է, որ դեռահասները կասկածվում են ռուսամետ հաքերների հետ Telegram-ի միջոցով կապ հաստատելու մեջ: Նա ասել է, որ իր որդուն ձերբակալել են երկուշաբթի՝ տնային աշխատանք կատարելիս: Դիմակավորված ութ տղամարդ մտել են բնակարան՝ խուզարկության օրդերով:
Նիդերլանդների ազգային դատախազությունը BBC-ին հաստատել է, որ դեռահասները դատարան են ներկայացել նախնական կալանքի լսումների համար, սակայն հրաժարվել են բացահայտել գործի մանրամասները՝ կասկածյալների տարիքի և «հետաքննության շահերից ելնելով»։
Ըստ De Telegraaf-ի՝ Նիդերլանդներում լրտեսությունը պատժվում է մինչև ութ տարի ազատազրկմամբ (և մինչև 12 տարի, եթե այն հանգեցրել է մահվան): Այս հանցագործության համար նախատեսված պատժաչափերն ավելացվել են մայիսին: Անչափահասների համար առավելագույն պատիժը երկու տարի է, բայց կասկածյալների նկատմամբ կարող է կիրառվել մեծահասակների քրեական օրենսդրություն:
Լրատվամիջոցը գրում է, որ սա Նիդերլանդներում օտարերկրյա պետության կողմից անչափահասների հավաքագրման առաջին դեպքն է:
Թարգմանությունը՝ Էմմա Չոբանյանի
