30.05.2026 | 13:56
Նավթի գները նվազել են
ԱՄՆ-ը հանձնառու է օգնել Բաքվի և Երևանի միջև խաղաղության հաստատմանը. Բաքվում ԱՄՆ գործերի հավատարմատար
Քաղաքականություն
26.09.2025 | 19:10
Միացյալ Նահանգները հանձնառու է՝ օգնել Ադրբեջանի և Հայաստանի միջև երկարատև խաղաղության հաստատմանը։ Ադրբեջանական լրատվամիջոցների հաղորդմամբ՝ այս մասին տեսաուղերձում ասել է Ադրբեջանում ԱՄՆ դեսպանատան գործերի ժամանակավոր հավատարմատար Էմի Քարլոն։
«Ինձ համար մեծ պատիվ է գտնվել այստեղ՝ Ադրբեջանի և Միացյալ Նահանգների համար այս պատմական պահին։ Օգոստոսի 8-ին Սպիտակ տանը խաղաղության համաձայնագրի նախաստորագրումը նշանավորեց Հարավային Կովկասի տարածաշրջանի համար նոր, համարձակ գլուխ։ Միացյալ Նահանգները հանձնառու է օգնել Ադրբեջանի և Հայաստանի միջև երկարատև խաղաղության հաստատմանը։ Ամրապնդելով խաղաղության այս ուղին՝ մենք բացահայտում ենք Հարավային Կովկասի հսկայական ներուժը՝ որպես առևտրի, տարանցման և էներգետիկայի հանգույց։Այն մեր ապագա տնտեսական համագործակցության հիմքն է կազմում»,- ասել է նա։
Դիվանագետն ընդգծել է, որ ԱՄՆ-ի և Ադրբեջանի նախագահներ Դոնալդ Թրամփի և Իլհամ Ալիևի կողմից Վաշինգտոնում ստորագրված փոխըմբռնման հուշագիրը Վաշինգտոնի և Բաքվի միջև ռազմավարական գործընկերության հաստատման առաջին քայլն է։ Նա հույս է հայտնել, որ դա կամրապնդի փոխադարձ հետաքրքրություն ներկայացնող հարցերի շուրջ համակարգումը։
Թարգմանությունը՝ Էմմա Չոբանյանի
