Մոսկվան ԱԹՍ-ների հարձակման է ենթարկվել․ խոցվել են տասնյակ անօդաչուներ․ ՏԵՍԱՆՅՈՒԹ

ՀՕՊ ուժերը սեպտեմբերի լույս 23-ի գիշերը խոցել են Մոսկվա թռչող 17 անօդաչու թռչող սարք։ Այս մասին հայտարարել է Մոսկվայի քաղաքապետ Սերգեյ Սոբյանինը, գրում է Meduza-ն։

Սեպտեմբերի 22-ի երեկոյան քաղաքապետը հայտարարել է, որ ուկրաինական անօդաչու թռչող սարքերը հարձակվում են Մոսկվայի վրա։ Կեսգիշերին, ըստ Մոսկվայի իշխանությունների, խոցվել է 15 անօդաչու թռչող սարք։ Այսպիսով, ըստ Սոբյանինի, երեկոյան և գիշերվա ընթացքում ոչնչացվել է դեպի Մոսկվա թռչող 32 անօդաչու թռչող սարք։

Սեպտեմբերի 23-ի առավոտյան Մոսկվայի քաղաքապետը հայտնել է, որ ևս երկու անօդաչու թռչող սարք է խոցվել։

Ռուսաստանի պաշտպանության նախարարությունը հայտնել է, որ գիշերը ՀՕՊ ուժերը Բելգորոդի, Բրյանսկի, Կալուգայի և Կուրսկի մարզերի, Մոսկվայի, Ռոստովի, Ռյազանի, Սամարայի և Սարատովի մարզերի, ինչպես նաև  բռնակցված Ղրիմի  տարածքում խոցել են ուկրաինական 69  ԱԹՍ։

Մոսկվայի մարզի Օդինցովոյի և Սերգիև Պոսադի շրջանների, ինչպես նաև Մոսկվայի մի քանի շրջանների բնակիչները հայտնել են երեկոյան լսված պայթյունների ձայների մասին։ Մոսկվայի մարզի Ռեուտով քաղաքում անօդաչու թռչող սարքի բեկորներից վնասվել է չորս մեքենա։ Baza տելեգրամ ալիքը հայտնել է, որ կայանատեղիում ԱԹՍ է ընկել։

Մերձմոսկովյան Իստրայի վարչակազմը հայտնել է, որ բնակավայրի վրա հետ է մղվել չորս ուկրաինական անօդաչու թռչող սարքերի հարձակումը։ Նախնական տեղեկությունների համաձայն՝ տուժածներ չկան։

Շերեմետևո օդանավակայանը ժամանակավորապես փակվել է անօդաչու թռչող սարքերի հարձակման պատճառով։ Վնուկովոյում ավելի քան 20 չվերթ է հետաձգվել։

Թարգմանությունը՝ Էմմա Չոբանյանի