17.02.2026 | 01:59
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
«Զանգեզուրի միջանցքի» բացմամբ հնարավոր կլինի թյուրքական աշխարհի ինտեգրումը․ Թուրքիայի առևտրի նախարար
Քաղաքականություն
18.09.2025 | 15:42
Թուրքիայի առևտրի նախարար Օմեր Բոլաթն ընդգծել է Ադրբեջանի դերը որպես Անկարայի համար ռազմավարական կարևոր տարանցիկ կետ՝ դեպի Կենտրոնական Ասիա և Հեռավոր Արևելք ընդլայնվելու ճանապարհին ու խոսել, այսպես կոչված, «Զանգեզուրի միջանցքից», գրում է թուրքական Անադոլու գործակալությունը։
«Առաջիկայում Զանգեզուրի միջանցքի բացմամբ հնարավոր կլինի թյուրքական աշխարհի աշխարհագրական ինտեգրումը և տնտեսական հարաբերությունների զարգացումը, միաժամանակ, կակտիվանա Միջին միջանցքը, որը սկսվում է Հեռավոր Արևելքից և ձգվում մինչև Եվրոպա, և կամրապնդվի տարանցիկ առևտուրը»,- ասել է նա։
Անկարայում անցկացված Թուրքիա-Ադրբեջան գործարարների և արդյունաբերողների ասոցիացիայի (TÜİB) կողմից կազմակերպված Ադրբեջան-Թուրքիա տնտեսական և մշակութային հարաբերությունների կամուրջ միջոցառմանը մասնակցող Բոլաթը նշել է նաև, որ իր պաշտոնավարման ընթացքում Թուրքիա-Ադրբեջան առևտրի ծավալն ամեն տարի գերազանցել է նախորդ տարվա ցուցանիշը։
«Այս տարվա առաջին ութ ամիսների դրությամբ՝ մեր առևտրաշրջանառության ծավալն աճել է։ Հատկապես ներդրումները շատ կարևոր են։ Թուրքիայի ամենամեծ ներդրումն աշխարհում, գործարարների և ընկերությունների թվի առումով, Ադրբեջանում է։ Մեր ամենամեծ ներդրումը՝ 17 միլիարդ դոլարի չափով, նույնպես Ադրբեջանում է։ Ադրբեջանն իր հերթին ունի մոտ 3000 ընկերություն Թուրքիայում»։
Հավելենք, որ թեպետ Վաշինգտոնում օգոստոսի 8-ին ՀՀ-ի և Ադրբեջանի միջև ստորագրված համաձայնագրերով որևէ «Զանգեզուրի միջանցք» չի նախատեսվում, Բաքուն շարունակում է «միջանցք» եզրույթի օգտագործումը, որը կրկնում են նաև մի շարք թուրք պաշտոնյաներ։ Փաստաթղթերում նշվում է «Թրամփի երթուղու» (TRIPP) մասին։
Թարգմանությունը՝ Էմմա Չոբանյանի
