18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Հայաստանի հետ համագործակցության ներուժը գործնականում անսահման է. ՌԴ նախագահի խորհրդական. ՏԵՍԱՆՅՈՒԹ
Քաղաքականություն
23.10.2018 | 17:51
Հայաստանի հետ համագործակցության ներուժը գործնականում անսահման է: Այս մասին այսօր՝ հոկտեմբերի 23-ին լրագրողների հետ հանդիպմանն ասաց ՌԴ նախագահի խորհրդական Սերգեյ Գլազևը, որը Երևանում մասնակցում է Եվրասիական գործընկերության միջազգային համաժողովին:
«Ուրախ ենք, որ Հայաստանն իրեն գտավ ԵՏՄ-ում՝ որպես դինամիկ զարգացող տնտեսություն, շատ տաղանդավոր մարդկանցով, որոնք ցանկանում են աշխատել ԵՏՄ-ի մեծ շուկայում: Այն գիտատեխնիկական պոտենցիալը, որը Հայաստանը պահպանել է դեռևս խորհրդային տարիներից, օգնում է նաև ռուս գործընկերներին: Հայաստանի համար ԵՏՄ շուկան հասկանալի է, և մեր համագործակցության ներուժը գործնականում անսահման է: Հուսով ենք՝ հետագայում նույնպես Հայաստանն իրեն հարմարավետ կզգա ԵՏՄ-ում»,- հավելեց Գլազևը:
ՌԴ նախագահի խորհրդականը կարևորեց նման համաժողովների անցկացումը. նման միջոցառումներ, նրա խոսքով, ԵՏՄ տարածքում որևէ այլ վայրում չեն անցկացվում: «Այս համաժողովների նշանակությունը մեծ է, քանի որ դրանք դուրս են գալիս հայ-ռուսական սովորական միջոցառումների սահմաններից: Առաջին անգամ բարձր փորձագիտական մակարդակով քննարկեցինք ԵՏՄ-ի տեխնոլոգիական զարգացման հարցը: Սա շատ կարևոր հարց է, քանի որ նրանից, թե ինչպես կզարգանանք տեխնոլոգիական առումով, կախված է նաև ամբողջ ԵՏՄ-ի զարգացման հեռանկարը»,- նշեց ռուսաստանցի պաշտոնյան:
