ՄԱԿ-ի հանձնաժողովը Գազայում Իսրայելի գործողությունները ցեղասպանություն է անվանել

ՄԱԿ-ի հետաքննող հանձնաժողովը երեքշաբթի եզրակացրել է, որ Իսրայելը ցեղասպանություն է իրականացնում  Գազայում, և որ այդ գործողությունները հրահրել են Իսրայելի բարձրաստիճան պաշտոնյաները, այդ թվում՝ վարչապետ Բենիամին Նեթանյահուն, գրում է France 24-ը։

Որպես ցեղասպանության եզրակացությունը հիմնավորող ապացույց՝ հանձնաժողովը մատնանշում է սպանությունների մասշտաբները, մարդասիրական օգնության արգելափակումը, մարդկանց հարկադիր տեղահանումը և վերարտադրողական առողջության կլինիկայի ոչնչացումը։

«Գազայում ցեղասպանություն է տեղի ունենում։ Այս դաժան հանցագործությունների պատասխանատվությունը կրում են Իսրայելի կառավարության ամենաբարձր մակարդակի պաշտոնյաները, որոնք գրեթե երկու տարի է՝ կազմակերպում են ցեղասպանական արշավ Գազայի հատվածում պաղեստինյան խումբը ոչնչացնելու հատուկ մտադրությամբ»,- ասել է Պաղեստինի օկուպացված տարածքների հետաքննության հանձնաժողովի ղեկավար, Միջազգային քրեական դատարանի նախկին դատավոր Նավի Փիլլեյը։

Իսրայելը հայտարարել է, որ «կտրականապես մերժում է» ՄԱԿ-ի Անկախ միջազգային հետաքննող հանձնաժողովի զեկույցը, որը պարզել է, որ Իսրայելը 2023 թվականի հոկտեմբերից ի վեր «ցեղասպանություն» է իրականացրել Գազայում։

«Իսրայելը կտրականապես մերժում է այս աղավաղված և կեղծ զեկույցը և կոչ է անում անհապաղ լուծարել այս հետաքննող հանձնաժողովը»,- ասվում է Իսրայելի արտաքին գործերի նախարարության հայտարարության մեջ։

ՄԱԿ-ում Իսրայելի դեսպանը եզրակացություններն անվանել է «զրպարտչական հայտարարություն»։

Զեկույցը, որը նաև պարզել է, որ Իսրայելի բարձրաստիճան պաշտոնյաները, այդ թվում՝ վարչապետ Բենիամին Նեթանյահուն, հրահրել են ցեղասպանական գործողություններ, «սկանդալային» և «կեղծ» է։ Այս մասին էլ հայտարարել է Ժնևում՝ ՄԱԿ-ում և այլ միջազգային կազմակերպություններում Իսրայելի մշտական ​​ներկայացուցիչ Դանիել Մերոնը։

Ավելի վաղ միջազգային լրատվամիջոցները հայտնել էին, որ իսրայելական բանակը լույս երեքշաբթի գիշերը շաբաթներ տևած ռմբակոծությունից հետո սկսել է լայնածավալ հարձակումը Գազա քաղաքի վրա՝ այն գրավելու համար։

Թարգմանությունը՝ Էմմա Չոբանյանի