Հասարակություն
10.09.2025 | 16:35Հայաստանի երրորդ նախագահ Սերժ Սարգսյանի գործով դատական նիստին դատավոր Գիվի Հովհաննիսյանը անդրադարձավ այն հանգամանքին, որ 2008-ի մարտի 1-ի իրադարձություններից հետո իր հոր և եղբոր նկատմամբ քրեական հետապնդում է իրականացվել, և ինքը եղել է նրանց փաստաբանը:
«2008-ին հայրս ենթարկվել է ակնհայտ ապօրինի հետապնդման»,- ասաց Գիվի Հովհաննիսյանը:
Նշենք, որ դատավորի հայրը՝ 2008-ին պաշտոնաթող գնդապետ Համլետ Հարությունյանը, նախագահական ընտրությունների ժամանակ եղել է նախագահի թեկնածու Լևոն Տեր-Պետրոսյանի Լոռու նախընտրական շտաբի համակարգողը։ Եղբայրը՝ Գագիկ Հովհաննիսյանն էլ եղել է «Վարդաշեն» քրեակատարողական հիմնարկի պետի տեղակալ։
Գագիկ Հովհաննիսյանը Մարտի 1-ի իրադարձությունների գործերով դատապարտվել է, իսկ հայրը՝ Համլետ Հովհաննիսյանը, որին մեղադրում էին զանգվածային անկարգություններ կազմակերպելու մեջ, տևական ժամանակ եղել է ընդհատակում, ապա այն բանից հետո, երբ որդու նկատմամբ համաներում է կիրառվել, ընդհատակից դուրս է եկել և ներկայացել իրավապահներին։
Դատավորը հայտնեց, որ հոր նկատմամբ քրեական հետապնդումը դադարեցվել է Սերժ Սարգսյանի նախագահության տարիներին: Բացահայտելով վերը նշված հանգամանքները՝ դատավորն ասաց, որ Սերժ Սարգսյանը Մարտի 1-ի իրադարձությունների գործով մեղադրյալ չէ և ինքը կարող էանաչառ լինել:
Կողմերը դատավորի անաչառությունը կասկածի տակ դնող հանգամանքներ չհայտնեցին, և դատավոր Հովհաննիսյանն ինքնաբացարկ չհայտնեց:
Մանրամասները՝ տեսանյութում:
Արաքս Մամուլյան
