30.07.2026 | 19:39
Ռուսաստանը բենզինի արտահանման արգելքը երկարաձգել է մինչև 2027 թվականի հունվարի վերջը
Թրամփը հայտնել է Իրաքում առևանգված հայտնի փորձագետի ազատ արձակման մասին
Քաղաքականություն
10.09.2025 | 16:56
ԱՄՆ նախագահ Դոնալդ Թրամփը հայտարարել է Իրաքում առևանգված Մերձավոր Արևելքի հարցերով փորձագետ Էլիզաբեթ Ցուրկովի ազատ արձակման մասին: Այս տեղեկությունը հաստատել է Իրաքի վարչապետ Մոհամմեդ Շիա ալ-Սուդանին, գրում է Current time-ը։
«Ուրախ եմ հայտնել, որ Լիզա Ցուրկովը՝ Փրինսթոնի ուսանողուհի, որի քույրը ԱՄՆ քաղաքացի է, հենց նոր ազատ է արձակվել «Քաթաիբ Հըզբոլլահ»-ի կողմից (Հեզբոլլահի զինյալ թև) և այժմ անվտանգ է Իրաքում ԱՄՆ դեսպանատանը՝ ամիսներ տևած խոշտանգումներից հետո։ Ես միշտ պայքարելու եմ արդարադատության համար և երբեք չեմ հանձնվի։ ՀԱՄԱՍ, ԱԶԱՏԵ՛Ք ՊԱՏԱՆԴՆԵՐԻՆ ՀԻՄԱ»,- գրել է Թրամփը Truth Social սոցիալական ցանցում։
Ցուրկովն ունի Իսրայելի և Ռուսաստանի քաղաքացիություն։ Նա ապրել և աշխատել է Միացյալ Նահանգներում։ Իսրայելական լրատվամիջոցները հայտնել էին, որ նա Իրաք է մեկնել ռուսական անձնագրով՝ հետազոտություններ անցկացնելու համար։ 2023 թվականի հուլիսին հայտնվել էին նրա առևանգման մասին առաջին հաղորդագրությունները։ Դրանից հետո Իսրայելի իշխանությունները հայտնել էին, որ նա ողջ է, և ամեն ինչ անում են նրան ազատելու համար։
2025 թվականի մայիսի 25-ին հաղորդվել էր, որ Ցուրկովն ազատ կարձակվի «10 օրվա ընթացքում»՝ յոթ մարդու դիմաց։ Իսրայելական Haaretz-ը գրել էր, որ նա կարող է փոխանակվել «Հըզբոլլահ» խմբավորման անդամների հետ,որոնք Իսրայելում գտնվում են ռազմագերիների կարգավիճակում։
Հավելենք, որ Ցուրկովը որպես Մերձավոր Արևելքի ուսումնասիրություններով զբաղվող հետազոտող առաջիններից էր, որ Արցախյան 44-օրյա պատերազմից առաջ ու դրա ընթացքում բացահայտում և լուսաբանում էր, թե ինչպես է Թուրքիան սիրիացի վարձկաններին տեղափոխում Ադրբեջան՝ ԼՂ-ի դեմ ագրեսիային մասնակցելու համար։ Նա նման բովանդակությամբ մի շարք հրապարակումներ ունի։
Թարգմանությունը՝ Էմմա Չոբանյանի
