07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
ԶԼՄ-ները հայտնում են Ղազախստանի ԱԳ նախարարի ձերբակալման մասին, պաշտոնական Աստանան՝ հերքում
Քաղաքականություն
04.09.2025 | 15:10
ORDA-ն, վկայակոչելով իրավապահ մարմիններում իր աղբյուրները, գրում է Ղազախստանի ԱԳ նախարար Մուրատ Նուրտլեուի ձերբակալության մասին, փոխանցում է Gazeta.ru-ն։
Նշվում է, որ դիվանագետը ձերբակալվել է իր տանը Չինաստանում Շանհայի համագործակցության կազմակերպության գագաթնաժողովից վերադառնալուց անմիջապես հետ։ Ըստ աղբյուրի ձերբակալվել են նաև գործարար Հաջի Հաջիևը, որի տանը խուզարկություններ են անցկացվել, ինչպես նաև Ղազախստանի Ազգային անվտանգության կոմիտեի մի շարք բարձրաստիճան աշխատակիցներ։
Ավելի ուշ Ղազախստանի տեղեկատվության նախարար Աիդա Բալաևան հայտարարել է, որ երկրի ԱԳ նախարարի ձերբակալման մասին տեղեկատվությունը չի համապատասխանում իրականությանը։
«Որոշ պաշտոնական ԶԼՄ-ներ ու անանուն տելեգրամ ալիքներ տարածում են չհաստատված տեղեկատվություն պետական ծառայողների ձերբակալման մասին»,-գրել է նա ֆեյսբուքյան իր էջում՝ նշելով, որ պետք է հիշել , որ գոյություն ունի տարածվող տեղեկատվության իսկության ստուգման պարտավորություն։
Ղազախական մի շարք ԶԼՄ-ներ, իրենց աղբյուրներին վկայակոչելով, ևս հերքում են ձերբակալությունների մասին լուրերը։
Հիշեցնենք՝ Ղազախստանի ՊՆ-ն օգոստոսի 13-ին հաստատել էր Լեհաստանում ՝ երկրի ռազմական կցորդի ձերբակալությունը։ Օգոստոսի սկզբին կաշառք ստանալու կասկածանով Ղազախստանում ձերբակալվել էր նաև տրանսպորտի նախարարի տեղակալ Սանժան Աբլալիևը։
Հունիսին ղազախական դատարանը արդարադատության նախկին նախարար Մարատ Բեկետաևին դատապարտել էր 9 տարվա ազատազրկման ՝խարդախության, խոշոր չափերի յուրացման, ձեռնարկատիրական գործունեության մեջ անօրինական մասնակցության համար։
Թարգմանությունը՝ Էմմա Չոբանյանի
