18.12.2025 | 15:06
Արման Ծառուկյանը՝ Բայդուլաևի դեմ մենամարտում տհաճ միջադեպի մասին․ ՏԵՍԱՆՅՈՒԹ
Տեսնենք, թե ինչ բացատրություններ ունի ամերիկյան կողմը. Պեսկովը՝ ՄՓՀՀՈՀ-ից ԱՄՆ-ի դուրս գալու մտադրության մասին
Քաղաքականություն
22.10.2018 | 18:15
Կրեմլում կարծում են, որ Միջին և փոքր հեռահարության հրթիռների ոչնչացման մասին Համաձայնագրից (ՄՓՀՀՈՀ) ԱՄՆ-ի հնարավոր դուրս գալն աշխարհում տիրող իրադրությունն ավելի վտանգավոր կդարձնի: ՏԱՍՍ-ի փոխանցմամբ՝ այս մասին լրագրողների հետ զրույցում հայտարարել է ՌԴ նախագահի խոսնակ Դմիտրի Պեսկովը:
Նա նշել է, որ թեման քննարկվելու է նաև ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի հետ բանակցություններում, որը երկուշաբթի և երեքշաբթի մի շարք հանդիպումներ է ունենալու Ռուսաստանի բարձրաստիճան պաշտոնյաների հետ:
«Իհարկե, մենք պետք է տեսնենք, թե ինչ բացատրություններ ունի այդ հարցով ամերիկյան կողմը, քանի որ դա ռազմավարական անվտանգության հարց է»,- հայտարարել է նա՝ հավելելով, որ Համաձայնագրից դուրս գալու գործընթացը կես տարի է տևում, և ԱՄՆ դեռևս այն չի նախաձեռնել:
Կրեմլի խոսնակը նշել է նաև, որ այդ Համաձայնագրի շուրջ «եղել են և կան խնդրահարույց պահեր», որոնք բազմիցս մատնանշել է ՌԴ նախագահը: «Ասիայում և այլ տարածաշրջաններում բազմաթիվ երկրներ նման համակարգեր են մշակում, որոնք կարող են որակվել որպես փոքր և միջին հեռահարության հրթիռներ: Չնայած դրան՝ հենց Ռուսաստանն ու ԱՄՆ-ն են մնում առանցքային երկրներ, որոնք պատասխանատվություն են կրում համաշխարհային կայունության և անվտանգության համար»,- ընդգծել է Դմիտրի Պեսկովը:
Նշենք, որ նախօրեին Թրամփը հայտարարել էր, որ Վաշինգտոնը դուրս է գալու 1987 թվականին ԱՄՆ և ԽՍՀՄ ղեկավարներ Ռոնալդ Ռեյգանի ու Միխայիլ Գորբաչովի կնքած Միջին և փոքր հեռահարության հրթիռների ոչնչացման մասին Համաձայնագրից:
ԱՄՆ նախագահը որոշումը պատճառաբանել էր այն հանգամանքով, որ Ռուսաստանը խախտում է համաձայնագրի կետերը, և փաստաթուղթն ԱՄՆ-ի համար անընդունելի է: Ռուսական կողմը հերքում է Վաշինգտոնի մեղադրանքները՝ հավաստելով, որ հավատարիմ է Համաձայնագրի դրույթներին:
