05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Բաքվից հայտարարում են, թե «Արևմտյան Ադրբեջան» վերադառնալն Ադրբեջանում համազգային գաղափար է
Քաղաքականություն
03.09.2025 | 16:34
«Արևմտյան Ադրբեջան» վերադառնալն Ադրբեջանում համազգային գաղափար է։ Այս մասին հայտարարել է «Արևմտյան Ադրբեջանի համայնք» հասարակական կազմակերպության նախագահ, ադրբեջանական Մեջլիսի պատգամավոր Ազիզ Ալեքբերլին՝ արձագանքելով նախօրեին Արցախի Անկախության օրվա առթիվ Հայաստանում տեղի ունեցած միջոցառումներին։
Նշենք, որ Բաքվում որպես «Արևմտյան Ադրբեջան» ներկայացվում է ՀՀ տարածքը։
«Ադրբեջանի նախագահ Իլհամ Ալիևի հետևողական ջանքերի և հեռատես քաղաքականության շնորհիվ համակարգված աշխատանք է տարվում Հայաստանի և Ադրբեջանի միջև հարաբերությունների կարգավորման ուղղությամբ։ Իհարկե, աշխարհում կան ուժեր, որոնք չեն ցանկանում, որ տարածաշրջանում խաղաղություն հաստատվի, և այդ ուժերը փորձում են վերահսկել Հայաստանի անջատողական ուժերին՝ համաձայն իրենց շահերի։ Ցավոք, նման գործողությունները հիմնականում վնասում են հենց հայ ժողովրդին։ Ինչ վերաբերում է այն փաստին, որ անջատողական ուժերն իրենց որոշ երազանքներ քարի են վերածում Հայաստանում, դա մեզ համար այդքան էլ հետաքրքիր չէ, և մենք մեր գործունեությունը չենք հիմնում նրանց անպատասխանատու գործողությունների վրա։ Այսօր Արևմտյան Ադրբեջան վերադառնալն Ադրբեջանում համազգային գաղափար է, մեր հայրենակիցների իրավունքը՝ հիմնված միջազգային իրավունքի վրա, և մի հարց, որը համապատասխանում է ոչ միայն ադրբեջանական ժողովրդի, այլև հայ ժողովրդի շահերին։ Արևմտյան Ադրբեջանի փախստականների վերադարձն իրենց հայրենիք՝ այսօրվա Հայաստանում, երկու երկրների ու ժողովուրդների միջև վստահության կայունության պայման ու երաշխիք է»,- ասել է նա ադրբեջանական լրատվամիջոցի հետ զրույցում։
Օգոստոսի 8-ին Վաշինգտոնում Հայաստանի և Ադրբեջանի միջև խաղաղության պայմանագրի նախաստորագրումից հետո ադրբեջանական մի շարք լրատվամիջոցներ հայտնել էին, թե Ադրբեջանը սկսել է լուծարել, այսպես կոչված, «Արևմտյան Ադրբեջանի» հետ կապված կազմակերպությունները, և Ազիզ Ալեքբերլին «համապատասխան հրաման է ստացել նախագահական վարչակազմից»։
Սակայն հետագայում Ալեքբերլին հերքել էր այդ տեղեկությունները՝ նշելով, որ դա բացարձակ սուտ է։
Հավելենք, որ, այսպես կոչված, «Արևմտյան Ադրբեջանի համայնքն» ընդունել է նաև «վերադարձի հայեցակարգ»՝ ապահովելու համար, իբր, «Հայաստանի տարածքից վտարված ադրբեջանցիների անվտանգ և արժանապատիվ, խաղաղ վերադարձը»։
Թարգմանությունը՝ Էմմա Չոբանյանի
