Ադրբեջանում հերթական լրագրողն է կալանավորվել

Ադրբեջանի իշխանությունների կողմից անկախ և ընդդիմադիր լրատվամիջոցների, ընդդիմադիրների ու հասարակական գործիչների նկատմամբ շարունակվող բռնաճնշումների շրջանակում ևս մեկ լրագրող է ձերբակալվել։ Ֆոտոլրագրող Ահմադ Մուխտարը կալանավորվել է Meydan TV-ի  գործով։

Նա ձերբակալվել է օգոստոսի 27-ին։ Բաքվի  Խաթայի շրջանային դատարանը նրա նկատմամբ 40-օրյա նախնական կալանքի որոշում է կայացրել։

Մուխտարի շահերը կներկայացնի պետության կողմից նշանակված փաստաբանը։ Նա Meydan TV-ի գործով կալանավորված 12-րդ անձն է։

Միաժամանակ, այս  գործով մեղադրանքները խստացվել են, մեղադրյալներին առաջադրվել են նոր մեղադրանքներ՝ Ադրբեջանի Քրեական օրենսգրքի հետևյալ հոդվածներով՝ հոդված 192.2.2 (անօրինական ձեռնարկատիրություն, որը հանգեցնում է խոշոր եկամուտների ստացմանը), հոդված 192.2.3 (կատարում կազմակերպված խմբի կողմից), հոդված 193-1.3.1 (հանցավոր ճանապարհով ձեռք բերված գույքի օրինականացում), հոդված 193-1.3.2 (կատարվել է խոշոր չափերով), հոդված 206.4 (մաքսանենգություն, որը կատարվել է կազմակերպված խմբի կողմից), հոդված 213.2.1 (հարկերից, վճարներից և վճարներից խուսափելը, որը կատարվել է կազմակերպված խմբի կողմից), հոդված 320.1 (փաստաթղթերի կեղծում), հոդված 320.2 (կեղծ փաստաթղթերի օգտագործում):

Ձերբակալված լրագրողներին այժմ մեղադրանք է առաջադրվել Քրեական օրենսգրքի, ընդհանուր առմամբ, ութ հոդվածով։ Լրագրողները հերքում են բոլոր մեղադրանքները և պնդում , որ պատժվում են իրենց քննադատական ​​​​լրագրողական նյութերի համար։

Հավելենք նաև, որ ըստ ադրբեջանցի իրավապաշտպանների վերջին տվյալների՝ Ադրբեջանում քաղբանտարկյալների թիվը հասել է 375-ի։

Թարգմանությունը՝ Էմմա Չոբանյանի