Ռուսաստանը բացասական ազդանշաններ է տալիս հանդիպումների վերաբերյալ. Զելենսկի

Ուկրաինայի նախագահ Վլադիմիր Զելենսկին հայտարարել է, որ ռուսները բացասական ազդանշաններ են տալիս հանդիպումների և հետագա զարգացումների վերաբերյալ։ ՌԲԿ Ուկրաինայի փոխանցմամբ՝ այս մասին տելեգրամում գրել է Ուկրաինայի նախագահը։

Զելենսկին նշել է, որ «շատ լավ զրույց» է ունեցել Ֆինլանդիայի նախագահ Ալեքսանդր Ստուբի հետ՝ հավելելով, որ շփման ընթացքում դիրքորոշումները համաձայնեցվել են՝ ավելի նշանակալի արդյունքների հասնելու համար։ Նա նշել է, որ թիմերն ակտիվորեն պատրաստում են Ուկրաինայի համար ամուր և բազմակողմանի անվտանգության երաշխիքների ճարտարապետությունը, նախապատրաստական ​​աշխատանքներին մասնակցում են եվրոպացի և ամերիկացի գործընկերները, ինչպես նաև կամավորների կոալիցիայի մյուս երկրները։

Զինվորական հրամանատարները, պաշտպանության նախարարները և անվտանգության խորհրդականները տարբեր մակարդակներում աշխատում են ապագա անվտանգության բաղադրիչների վրա։

«Մենք արագացնում ենք դետալների սահմանումը։ Ժամանակն է կազմակերպել առաջնորդների միջև զրույցի ձևաչափ՝ հիմնական շեշտադրումներն ու ժամկետները որոշելու համար»,- նշել է Զելենսկին։

Ուկրաինայի նախագահը նաև ընդգծել է Միացյալ Նահանգների հետ հարաբերությունների կարևորությունը և այդ շփումներում առավելագույն բովանդակության ապահովումը։

«Ռուսները հիմա բացասական ազդանշաններ են տալիս հանդիպումների և հետագա զարգացումների վերաբերյալ։ Մեր քաղաքների և գյուղերի վրա հարձակումները շարունակվում են։ Ամեն օր նոր զոհեր։ Ռուսները հաշվի կառնեն միայն ուժեղ ճնշումը՝ ի պատասխան այս ամենի։ Անհրաժեշտ են քայլեր կոնկրետ Ռուսաստանի կողմից՝ քայլեր դեպի իրական դիվանագիտություն»,- հավելել է նա։

Եվրոպացի առաջնորդները վերջին շրջանում հաճախ են  քննադատում Ռուսաստանի նախագահ Վլադիմիր Պուտինին՝ Զելենսկիի  հետ հանդիպման նախապատրաստական ​​աշխատանքները ձգձգելու համար, որի մասին նախկինում հայտարարել էր ԱՄՆ նախագահ Դոնալդ Թրամփը։

Թարգմանությունը՝ Էմմա Չոբանյանի