29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Լեհաստանի նախագահը վետո է դրել ուկրաինացիներին օգնության մասին օրենքի վրա
Քաղաքականություն
25.08.2025 | 17:30
Լեհաստանի նախագահ Կարոլ Նավրոցկին վետո է դրել Ուկրաինայի քաղաքացիներին օգնության մասին օրենքում կատարված փոփոխությունների վրա, որոնք նախատեսում էին նպաստների վճարում և ժամանակավոր պաշտպանության կարգավիճակի երկարաձգում։ Այս մասին հաղորդում է Rzeczpospolita-ն, որին վկայակոչում է BBC-ի ռուսական ծառայությունը։
Խոսքը 18 տարեկանից փոքր յուրաքանչյուր երեխայի համար ամսական 800 զլոտի (մոտ 190 եվրո) վճարումների մասին է։ Նավրոցկիի խոսքով՝ այս նպաստը պետք է ստանան միայն այն ուկրաինացիները, որոնք աշխատում են Լեհաստանում։
Փոփոխությունները ենթադրում էին նաև ուկրաինացիների համար ժամանակավոր պաշտպանության կարգավիճակի երկարաձգում մինչև 2026 թվականի մարտի 4-ը։ Օրինագիծն ուղարկվել է վերանայման։
Նավրոցկին առաջարկել է նաև օրենսդրության մեջ ամրագրել «դադարեցնել բանդերիզմը» կարգախոսը և «Բանդերայի խորհրդանիշները» նույնացնել նացիզմի և խորհրդային կոմունիզմի խորհրդանիշների հետ։
«Ռուսական քարոզչությունը վերացնելու և լեհ-ուկրաինական հարաբերություններն իրական գործընկերության, փոխադարձ հարգանքի և փոխադարձ զգայունության վրա կառուցելու համար անհրաժեշտ եմ համարում օրինագծում ներառել հստակ կարգախոս՝ դադարեցրե՛ք բանդերիզմը»,- ասել է Լեհաստանի նախագահը։
Օգոստոսի կեսերին Նավրոցկին արդեն առաջարկել էր արգելել կարմիր-սև «Բանդերայի դրոշը»։ Պատճառը բելառուս ռեփեր Մաքս Կորժի՝ Վարշավայում կայացած համերգն էր, որտեղ երևում էին Ուկրաինայի ապստամբական բանակի խորհրդանիշերը (այն ճանաչվել է որպես ծայրահեղական և մեղադրվում է լեհերի սպանություններին մասնակցելու համար)։
Թարգմանությունը՝ Էմմա Չոբանյանի
