12.09.2026 | 12:53
Հայաստանի 4 մարզում և Երևանում Անկախության 35-ամյակին նվիրված միջոցառումներ կանցկացվեն
Հայաստանի տնտեսական ակտիվության ցուցանիշը 7 ամսում աճել է 7 տոկոսով
Տնտեսություն
25.08.2025 | 13:10
Հայաստանի տնտեսական ակտիվության ցուցանիշն այս տարվա հունվար-հուլիս ամիսներին նախորդ տարվա նույն ժամանակահատվածի նկատմամբ աճել է 7 տոկոսով:
«Արմենպրես»-ի փոխանցմամբ՝ այս մասին փաստում են ՀՀ վիճակագրական կոմիտեի հրապարակած տվյալները:
Արդյունաբերական արտադրանքի ծավալը 7 ամսում նախորդ տարվա նույն ժամանակահատվածի համեմատ նվազել է 9.8 տոկոսով՝ կազմելով 1 տրլն 501 մլրդ 748.3 մլն դրամ: Շինարարության ծավալն ավելացել է 20.2 տոկոսով՝ կազմելով 293 մլրդ 301.8 մլն դրամ:
Առևտրի շրջանառությունում աճը 3.9 տոկոս է՝ 3 տրլն 539 մլրդ 964 մլն դրամ ծավալով: Նույն ժամանակահատվածում մատուցված ծառայությունների ծավալն ավելացել է 10.6 տոկոսով՝ կազմելով 2 տրլն 176 մլրդ 542.4 մլն դրամ:
2025 թվականի հունվար-հուլիսին սպառողական գների ինդեքսը նախորդ տարվա նույն ժամանակահատվածի համեմատ ավելացել է 3.2 տոկոսով, իսկ արդյունաբերական արտադրանքի գների ինդեքսը՝ 2.5 տոկոսով: Էլեկտրաէներգիայի արտադրության ծավալներում արձանագրվել է 2.1 տոկոս աճ:
Արտաքին առևտրաշրջանառության ծավալն այս տարվա 7 ամսում 2024-ի նույն ժամանակահատվածի համեմատ նվազել է 41.4 տոկոսով՝ կազմելով 11 մլրդ 538 մլն դոլար: Ընդ որում՝ արտահանումը նվազել է 48.3, իսկ ներմուծումը՝ 35.8 տոկոսով:
Դրամի փոխարժեքը ԱՄՆ դոլարի նկատմամբ հունվար-հուլիս ամիսներին կազմել է 390.27 դրամ:
