ՀՀ-ի համար բացվում են Ադրբեջանով անցնող ճանապարհները, ապաշրջափակումը երկկողմանի պրոցես է․ Խուդաթյան․ ՏԵՍԱՆՅՈՒԹ

«ՀՀ-ն ստանում է ապաշրջափակված ճանապարհներ՝ տարածքային ինքնիշխանության, սուվերինության և իրավազորության ներքո»,- այս մասին կառավարության նիստից հետո լրագրողների հետ ճեպազրույցում հայտարարեց ՏԿԵ նախարար Դավիթ Խուդաթյանը։

Նրա խոսքով՝ ՀՀ-ի համար բացվում են Ադրբեջանով անցնող ճանապարհները, որովհետև ապաշրջափակումը երկկողմանի պրոցես է։

Լրագրողները մի քանի հարց ուղղեցին՝ արդյո՞ք այդ ճանապարհները վերահսկելու են հայ սահմանապահները։ Դավիթ Խուդաթյանն այս հարցին ուղիղ չպատասխանեց՝ նշելով, որ դետալները դեռ չեն քննարկվել։ Նախարարը չպատասխանեց նաև հարցին, թե բեռներն ինչ տարբերակով են ստուգվելու։ Խուդաթյանն ասաց, որ դրա վերաբերյալ ինֆորմացիա չի կարող տալ։

«Խաղաղության պայմանագրի նախաստորագրումը մեզ մի շատ մեծ քայլ մոտեցնում է խաղաղությանը, ինչը, կարծում եմ, ՀՀ յուրաքանչյուր քաղաքացու համար սպասված և ուրախալի և կարևոր իրադարձություն է: Պիտի ասեմ, որ նախկինում այսպիսի մեկնաբանություններ էլի են հնչել խաղաղության պայմանագրի տեքստի մասով, երբ չարագուշակ մեկնաբանություններ էին արվում, իսկ տեքստի հրապարակումից առաջ պարզվեց, որ այնտեղ ՀՀ-ի համար ոչ մի սարսափելի, ոչ մի ողբերգական և ոչ մի չարագուշակ բան չկար»,- նշեց նա։

Նախարարը նշեց, որ ապաշրջափակումը չորս սկզբունքներով է տեղի ունենալու։
Ըստ նրա՝ եթե չորս սկզբունքներով ապաշրջափակումը որևէ մեկը «միջանցք» կոչի, ապա դա շահարկում է։

Մանրամասները՝ տեսանյութում։