06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ճամբարակի երեք բնակավայրում ընթանում են խմելու ջրատարի ներքին ու արտաքին ցանցերի վերակառուցման աշխատանքներ
Տնտեսություն
12.08.2025 | 15:20
Գեղարքունիքի մարզի Ճամբարակ համայնքի երեք բնակավայրերում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում 2025 թվականի հունիսից սկսվել և ընթանում են խմելու ջրատարի արտաքին ու ներքին ցանցերի վերակառուցման աշխատանքներ։
Ինչպես տեղեկացրին Ճամբարակի համայնքապետարանի աշխատակազմից, Ճամբարակ քաղաքի Վերին Ճամբարակ թաղամասի, Վահան և Ծափաթաղ գյուղերի խմելու ջրի մատակարարման համակարգերի վերակառուցման ծրագրի պայմանագրային արժեքը կազմում է 211 միլիոն 757 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Ճամբարակի համայնքապետարանը։
Ճամբարակ քաղաքի Վերին Ճամբարակ թաղամասում վերակառուցվում է ներքին և արտաքին ցանցը՝ շուրջ 17 կիլոմետր երկարությամբ, կառուցվում է ջրընդունիչ և վերանորոգվում 150 խորանարդ մետր տարողության ջրամբարը։
Վահան գյուղում իրականացվում է խմելու ջրատարի արտաքին ցանցի վերակառուցում՝ 2200 գծամետր երկարությամբ․ մետաղական հին խողովակները փոխարինվում են պոլիէթիլենային նոր խողովակներով։
Ծափաթաղ գյուղում կառուցվում է ջրընդունիչ և աղբյուրակապ, 500 մետր երկարության խմելու ջրատարի ներքին ցանց։
2025 թվականի օգոստոսի 12-ի դրությամբ արդեն իրականացվել է շինարարական աշխատանքների ընդհանուր ծավալի շուրջ 50 տոկոսը։
Աշխատանքները նախատեսվում է ավարտել 2026 թվականի հունվարին։
